Un total de cinco persoas resultaron feridas despois de colidir dous turismos ao seu paso polo concello pontevedrés de Redondela.
Ao fío das 10:30 horas desta mañá, un particular informaba ao 112 Galicia dun accidente entre dous vehículos que circulaban pola estrada que une Redondela e Arcade, á altura do lugar de Soutoxuste. O alertante indicaba que podía haber persoas feridas pero aseguraba que as persoas estaban accesibles.
Así, con estes datos, desde o 112 Galicia pasouse aviso decontado ao Servizo de Urxencias Sanitarias de Galicia-061, que derivou ata o lugar dúas ambulancias. Ademais foron informados os axentes da Garda Civil de Tráfico, da Policía Local, os Bombeiros de Redondela e os efectivos de Protección Civil.
Finalmente, tras chegar ao punto e evacuar aos feridos, os profesionais sanitarios confirmaron o traslado dun total de cinco persoas, dúas delas trasladadas á Clínica Fátima e os tres feridos restantes ao Hospital Domínguez.
Desde o 112 Galicia tamén se solicitou a colaboración do persoal do servizo de mantemento da estrada, que se encargou da limpeza da vía.