O Concello de Nigrán ofrecerá este ano o programa ‘Música nas Parroquias’ para colaborar na celebración de todas as festas patronais do municipio, xa que este ano ou ben non se constituíron comisións organizadoras por mor da crise do Covid-19 ou estas tiveron totalmente limitada a posibilidade de recadar fondos. Deste xeito, o Concello investirá un total de 20.000 € con axuda do Plan Concellos 2020 da Deputación para que en cada unha das parroquias, coincidindo seu día grande, celebren o concerto dunha banda de música a mediodía (13:00 horas) tras a habitual procesión. A maiores, o Concello lles ofrece a cada unha a posibilidade de elexir unha pequena actuación entre os grupos ou charangas que elixan.
“Todas as entidades involucradas acolleron esta iniciativa con ledicia e como algo positivo para a parroquia. Este é un ano diferente e non se van poder celebrar as festas como tal, pero desde o Concello queremos que si se manteña a tradición de xuntarse a veciñanza ao mediodía, neste caso respectando as medidas de seguridade que sexan precisas pero sen deixar de celebrar o clásico concerto da banda de música tras a procesión”, indica o alcalde, Juan González.
Así, este programa arrancará o sábado 13 de xuño para celebrar San Antonio de Vilariño coa Banda de Música do Val Miñor, as seguintes citas serán San Xoan de Panxón o 24 de xuño coa Banda de Música de Vincios, San Pedro da Ramallosa o 29 de xuño coa Banda de Música do Val Miñor, Santiago de Parada o 25 de xullo coa Banda de Música de San Miguel, San Fiz de Nigrán o 1 de xullo coa Banda de Música de Vincios, Virxe do Carme de Lourido o 2 de agosto coa Banda de Música de San Miguel, Virxe das Angustias de Nigrán o 16 de agosto coa Banda de Música do Val Miñor e o mesmo día en Chandebrito, San Roque de Camos o 24 de agosto coa Banda de Música de San Miguel e, finalmente, Bo Xesús de Priegue o 6 de setembro coa Banda de Música de Vincios.
