Vialia Estación de Vigo, o espazo que cambiará o concepto de cidade e que está chamado a converterse no centro neurálxico non só da propia cidade olívica senón de toda a súa contorna, amosou onte todos os seus secretos coa inauguración oficial das súas instalacións presidida polo alcalde Abel Caballero ao que acompañaban a secretaria de Estado de Transportes, Mobilidade e Axenda Urbana, Isabel Prado de Vera; a conselleira de Infraestruturas e Mobilidade da Xunta de Galicia, Ethel Vázquez; a presidenta da Deputación de Pontevedra, Carmela Silva, e o delegado do Consorcio Zona Franca de Vigo, David Regades, entre outras personalidades.
E complexo tentar describir nunha liñas, a enormidade da obra ideada por Tom Mayne, premio Pritzker de Arquitectura no 2005 –os premios Nobel da arquitectura– e considerado por propios e estraños como o enfant terrible pola paixón coa que defende todos e cada un dos seus proxectos.
O de Mayne foi executado polo estudo de arquitectura L35 que conta actualmente con sedes en Madrid, Barcelona e París e estudos asociados en diferentes cidades de todo o mundo.
Estación intermodal de ferrocarril e autobús, 120 locais comerciais dispoñibles –nestes momentos segundo adianta a empresa xestora de Vialia Estación de Vigo, Nhood España, cunha ocupación de preto do 100 %–, unha praza pública de máis de 30.000 metros cadrados, un aparcadoiro con capacidade para máis de 1.500 vehículos e un espectacular mirador sobre a ría de Vigo son algunhas das caracteristicas dunha obra que “que pon a Vigo no século XXI”, en palabras do alcalde Abel Caballero, e que está chamado a ser un elemento dinamizador de todo o sur de Pontevedra.
Cun investimento de máis de 90 millóns de euros, o centro comercial Vialia Estación de Vigo xerará máis de 2.000 empregos entre postos directos e indirectos, aos que se suman os case 1.000 profesionais que traballaron durante máis de dous anos na construción do espazo. Da importancia que pode ter para a dinamización do sur de Pontevedra, baste dicir que no portal de emprego creado porVialia Vigo rexistráronse ata o de agora máis de 16.000 candidatos e candidatas e 8.500 solicitudes de emprego.
“Non hai un proxecto igual a nivel nacional. É un espazo e cónico da modernidade e un referente mundial da arquitectura”, asegurou Manuel Teba, director de Nhood España, quen destacou “a gran revolución que supoñerá”. Nace este proxecto, asegurouse durante a inauguración, para transformar a cidade e a súa contorna conectando aos cidadáns co lecer, o deporte, a sustentabilidade, a cultura, a arte, a restauración e as compras.
A gastronomía, un dos eixos centrais de Vialia Vigo
No Food Court, ao aire libre, convivirán as grandes franquicias como McDonalds, Burger King, KFC, Taco Bell, Vips ou Ginos, entre outros, cos operadores locais como ‘La Pepita’, que serán unha parte esencial da identidade do centro. A oferta gastronómica a completa o restaurante Centeno, rexentado polo estrela Michelín Rafa Centeno.
Como elemento singular e característico de vialia Vigo destaca o gran faro como unha zona de xogo para nenos situada no food court cun campo cuberto de tres tobogáns o máis alto a máis de 10 m de altura.
Esta zona de gastronomía e lecer conta, ademais, como un gran escenario equipado cunha pantalla dixital de máis de 40 m² e todos os medios audiovisuais con 11 salas de cinema innovadoras na cidade con 3D, saga junior, saga Luxury e sala de xogos interactivos.
Construción sostible e accesible
Especial fincapé faise en que o proxecto de Vialia Estación de Vigo caracterízase pola aposta pola sustentabilidade e o respecto polo medioambiente como queda demostrado polo feito de contar coa maior puntuación da certificación BREEAM, un método internacional que permite medir o grao de sustentabilidade ambiental de edificios. Ademais, o centro comercial ten o compromiso firme de despregar unha estratexia de redución continua da pegada de carbono.
Entre as boas prácticas en materia de sustentabilidade postas en marcha, destacan os sistemas de recuperación de calor para a xeración de auga quente sanitaria e para o quecemento dos locais nos meses fríos ou a instalación de sistemas de iluminación de alta eficiencia. Instaláronse tamén equipos de baixo consumo para reducir o consumo de auga potable e contadores intelixentes para controlar os consumos de iluminación, climatización, ventilación, transporte vertical, forza e auga.
O 100 % a vexetación natural, tanto do interior como do exterior do proxecto, será autóctona e con baixos requirimentos hídricos o que permitirá un aforro anual de auga de 2 millóns e medio de litros. A absorción de CO2 de todas as plantas, entre as que se atopan 10 oliveiras, será de 340 toneladas anuais.
A innovación dixital
Entre as moitas sorpresas que irán descubrindo as e os visitantes de Vialia Vigo, a bo seguro que a que máis chamará a atención son as denominadas neuronas, grandes soportes dixitais que permitirán interactuar coas persoas usuarias a través do teléfono, xesto e voces así como proporcionar diversas informacións. Juan Louro, director do centro comercial, explica a misión das neuronas “ofrecer a mellor experiencia ao cliente sorprendéndoo cunha ampla variedade de contido dinámico”. Grazas ás neuronas, engade, “podemos facer de vialia un gran museo de arte dixital”.
A geolocalización converterase nunha das principais innovacións. A través desta tecnoloxía o visitante poderá seleccionar os destinos que lle interesen para recibir instrucións sobre como chegar a eles incluíndo roteiros adaptados e recursos como a localización do coche no aparcamento.
Para estar máis preto do cidadán, envíalle a Vigo desenvolveu unha app propia App Vialia Vigo, entre cuxas funcionalidades atópase a información sobre os eventos que terán lugar no centro comercial, ofertas, chat en vivo, e pago vía app entre outras.
