O Servizo Galego de Saúde e a Confederación Estatal de Sindicatos Médicos (CESM) mantiveron onte unha reunión, que se prolongou máis de 6 horas, na que se acadaron importantes compromisos vencellados a melloras retributivas e de xornada para o persoal médico, e polo que se dá por finalizada a folga de maneira inmediata.
Na reunión, que estivo presidida polo conselleiro de Sanidade, Julio García Comesaña, acordáronse compromisos nas seguintes materias: as gardas de presenza física e localizada en atención primaria e hospitalaria; a reconfiguración do complemento específico; os módulos na xornada ordinaria nas datas de especial significación (24 e 31 de decembro) que xa se cobran na maioría das categorías; e as contías do prezo das gardas para o persoal residente en formación que se verán tamén incrementadas na mesma proporción que o persoal facultativo especialista.
Concretamente, acordouse un incremento do prezo das gardas médicas, diferenciando as laborais das prestadas os domingos e festivos. Así como tamén, as prestadas a partir dun número de gardas igual ou superior a 5 gardas/mes.
O importe das gardas en día laborable de presenza física será a 1 de xullo, de 27 euros/hora e, a 1 de Xaneiro de 2024, de 28 euros/hora; no caso das gardas de presenza física (domingos e festivos) será de 30 €/hora; no das gardas localizadas en día laborable de 14 €/hora; no das gardas localizadas (sábados, domingos e festivos) de 15 €/hora e, finalmente, o prezo das gardas de presenza física prestadas a partir dun número de gardas igual ou superior a 5 gardas/mes, será de 37 euros a hora. Este último incremento producirase a partir do 1 de xaneiro de 2024.
Na xuntanza tamén se acordou negociar un novo modelo de exención de gardas de presenza física aos facultativos especialistas de área con máis de 55 anos. O prezo estimado é de 84 euros/hora por cada módulo de 4 horas, cun máximo de 3 módulos de promedio mensual, a aplicar ao 100 % a partir do 1 de xaneiro de 2024. A realización de módulos será fora do horario ordinario e con rexistro e seguimento da actividade.
Reconfiguración do complemento específico
Sobre o complemento específico, presentarase unha reconfiguración do mesmo -na liña do que teñen regulado outros servizos de saúde-, e de cara a diminuír a diferenza retributiva entre o persoal con dedicación exclusiva e o que non ten ese réxime de dedicación. A negociación do modelo pecharase o vindeiro 1 de xullo, para ser efectiva en xaneiro do ano 2024,cunha diferenciación máxima de 180 euros.
Neste momento queda desconvocada a folga de forma inmediata.
