A subdelegada do Goberno en Pontevedra, Maica Larriba, coordinou esta mañá cos principais mandos policiais da provincia o dispositivo preventivo co que se garantirá a operatividade das comunicacións con motivo da convocatoria dun paro patronal por parte dunha plataforma minoritaria do transporte. A subdelegada deu instrucións para que se tomen as medidas operativas oportunas que propicien a libre circulación dos transportistas que non secunden o paro, ante a posible presenza de piquetes.
Os dispositivos especiais terán lugar nos principais centros loxísticos da provincia, como son os portos de Vigo, Marín e Vilagarcía, así como os polígonos industriais con maior actividade relacionada co transporte de mercadorías. Despregaranse nestes puntos axentes das Forzas e Corpos de Seguridade do Estado que vixiarán para que se cumpra o dereito ao traballo dos transportistas e para que se manteña o subministro a puntos de venda, supermercados e superficies comerciais. O operativo desenvolverase desde a madrugada do luns.
A coordinación dos dispositivos tivo lugar no marco da Xunta Provincial de Seguridade presidida pola subdelegada do Goberno, na que tamén se analizaron as cifras de delincuencia e infraccións penais rexistradas na provincia durante os dez primeiros meses do ano. Acudiron ao encontro diversos responsables das Forzas e Corpos de Seguridade do Estado en Pontevedra, entre os que se atopaban o comandante da Garda Civil, Óscar Graña, o comisario xefe da Comisaría de Vigo-Redondela, Ramiro García, o comisario xefe da Comisaría de pontevedra, Juan José Díaz, e o comandante da Garda Civil de Tráfico na provincia, Antonio pérez Piteira.
É preciso ter en conta que a comparativa realizouse en relación ao mesmo período do ano 2021, un exercicio con cifras anómalas debido ás restricións sociais e da mobilidade derivadas da situación sanitaria provocada pola covid-19.
Tras analizar os datos achegados polos principais mandos das Forzas e Corpos de Seguridade do Estado da provincia, a subdelegada concluíu que “se rexistra un crecemento do 20% nas infraccións penais, estreitamente vinculado ao aumento dos delitos leves, tales como os pequenos furtos, os danos ou as lesións, froito da recuperación da actividade social normal tras a pandemia e, en moitas ocasións, relacionados co ocio nocturno”. Tamén contribúe a lastrar a estatística a maior incidencia dos ciberdelitos, que foron un 30 % superiores aos producidos nos dez primeiros meses de 2021.
Con todo, Maica Larriba destacou a importante actividade e eficacia policial ao longo deste período, o que se traduce nun 15,23 % máis en canto ao índice de esclarecemento de delitos e nun 13,52 % no número de detidos e postas a disposición de reclamados xudiciais. Así mesmo, as estafas a través de internet resolvéronse en case un 75 % e a participación policial en auxilios creceu un 33 %.
Doutra banda, a subdelegada tamén informou de que no ámbito provincial os delitos contra a liberdade sexual descenderon entre xaneiro e outubro un 12 %, mentres que se produciron 10 roubos con forza en vivendas máis. Maica Larriba alertou de que se está a detectar un repunte dos pequenos furtos en vehículos, segundo os mandos policiais, causados en moitos casos por persoas toxicómanas que rompen as fiestras para procurar diñeiro ou obxectos de valor. Porén, a subdelegada fixo un chamamento a evitar que, na medida do posible, se deixen nos vehículos teléfonos móbiles, dispositivos electrónicos, gafas de sol, prendas ou outros elementos que poidan incitar ao roubo.
Por cidades
En relación ás cifras globais rexistradas nas catro principais cidades da provincia desde xaneiro a outubro de 2022, a subdelegada explicou que estas seguen a tendencia provincial. En Pontevedra os delitos contra a liberdade sexual mantéñense nos mesmo rexistros que en 2021, increméntanse lixeiramente os furtos e denuncias por pelexas e pequenas lesións vinculadas ao ocio nocturno, mentres que as estafas por internet caen nun 7 %.
En Vigo, rexistrouse tamén unha baixada do 11 % nos delitos contra a liberdade sexual, mais incrementáronse de xeito importante os pequenos furtos relacionados coa recuperación total da actividade social tras a pandemia. Constátase, principalmente, un aumento das subtraccións en vehículos, así como dos furtos, lesións e danos leves. Como exemplo, Maica Larriba sinalou que se contabilizaron 475 furtos en coches, apelando, novamente, a non deixar obxectos á vista.
Doutra banda, destaca a gran actividade policial no esclarecemento de delitos que é un 15,39 % superior á do ano pasado, sendo especialmente significativa no relativo a roubos leves, onde crece un 43 % e nos roubos con violencia (28,57 %). Así mesmo, a subdelegada subliñou o importante labor policial na cidade cun 23 % máis de detidos e un 12,89 % máis de postas a disposición xudicial de persoas reclamadas.
A subdelegada quixo sinalar tamén que en Vilagarcía os delitos contra a liberdade sexual baixan nos primeiros dez meses do ano un 25%, os roubos con violencia un 12,5% os pequenos furtos un 51% e as ciberestafas redúcense nun 22%. O número de detidos caeu en 8 persoas con respecto ao mesmo período de 2021.
Por último, en Marín descenden á metade os delitos contra a liberdade sexual, os roubos con violencia son un 75% menos, os roubos con forza en vivendas redúcense nun 25% e os pequenos furtos nun 36%. Non obstante, tamén aumentan as substraccións en vehículos.
Botellóns
A subdelegada do Goberno analizou xunto aos mandos policiais a problemática dos botellóns nas dúas principais cidades da provincia e sinalou que, “sendo conscientes dos contratempos que esta actividade produce, os mandos policiais trasládannos que non existe preocupación relacionada coa seguridade cidadá”. “Así”, explicou, “a realidade é que as zonas de botellón rexistran menor incidencia de delitos que outras zonas de concentración de ocio nocturno”.
Con todo, a actividade policial para velar pola seguridade nos botellóns está a ser moi elevada, como exemplifican as máis de 80 actuacións preventivas levadas a cabo en Vigo nas que se busca, sobre todo, controlar a presenza de menores consumindo alcohol e outros estupefacientes.
Na zona portuaria levantáronse este ano 5 actas por consumo de estupefacientes, 4 por furtos e 3 por lesións, cifras que contrastan coas 210 actas levantadas noutras zonas de ocio nocturno da cidade.
En Pontevedra tamén se leva a cabo un importante labor de control, malia ser a presenza de menores e o seu control unha competencia da Unidade da Policía Autonómica (UPA). A maior parte dos servizos realizados nos botellóns de Pontevedra tiveron que ver con labores de auxilio ante intoxicacións etílicas, mentres que só dúas foron por roubos e outras dúas por lesións.
Tráfico
Na Xunta Provincial de Seguridade tamén se analizaron datos relacionados co tráfico. A subdelegada destacou que “aínda que nunca se pode falar de cifras positivas cando hai falecidos, o número de mortos nas estradas provinciais nos dez primeiros meses de 2022 ascende a 10 fronte aos 21 do mesmo período de 2021”. Malia todo, o número de accidentes con feridos sobe un 13 %.
Ademais, Maica Larriba informou de que no que vai de 2022 se realizaron 153.762 controis de alcoholemia das que 4.426 foron positivas. No relativo a drogas, o 61,42 % das probas realizadas tanto de maneira preventiva, como tras accidentes, deron positivo. Do total de condutores denunciados o 77,13 % deron positivo en consumo de cannabis, sendo a cocaína a segunda substancia máis detectada, por diante das anfetaminas.
