O delegado do Goberno en Galicia, Javier Losada, recoñeceu o papel esencial dos técnicos superiores sanitarios na prevención e loita contra a pandemia do coronavirus, polo seu contacto permanente cos pacientes e pola súas responsabilidades, que desempeñan “día a día” con total compromiso e alto grado de formación.
Javier Losada trasladoulle esta reflexión aos integrantes da xunta directiva de Atessga, asociación que representa a este colectivo en Galicia, cos que mantivo unha reunión por videoconferencia.
Durante o encontro, o delegado recibiu as aportacións deste colectivo ás conclusións sobre sanidade da Comisión para a Reconstrucción Social e Económica tras o Covid-19 do Congreso dos Deputados, comprometéndose a achegalas aos ministerios correspondentes.
O delegado do Goberno amosouse convencido de que esta lexislatura será a que cumpra as demandas de reclasificación profesional dos Técnicos Superiores Sanitarios adecuando a ordenación actual á formación e cualificación real destes profesionais. Javier Losada trasladoulle á xunta directiva a preocupación do Ministerio de Sanidade e do seu titular, Salvador Illa, na procura dunha solución legal a esta demanda que pasa por unha mellora da súa cualificación.
Ademáis, a reunión serviu para poñer en valor o perfil profesional dos técnicos superiores en Administración e Xestión Sanitarias de cara a formar parte dos dipositivos de seguemento e rastrexo na pandemia así como outras propostas a nivel sanitario.