A Deputación de Pontevedra, a través do seu Plan de Mantemento, xa recibiu ata o de agora 36 solicitudes dos concellos para actuar nos campos de fútbol da provincia, tanto de herba sintética como natural. Deste xeito, se as condicións meteorolóxicas son adecuadas, os traballos para a mellora destes espazos comezarán a partir da vindeira semana.
A través desta iniciativa, a institución provincial acondicionou o ano pasado un total de 91 campos de fútbol de 41 concellos da provincia: 59 de herba artificial e 32 de herba natural. Ademais, agora mesmo estanse a acondicionar campos en dous concellos, Vilagarcía e Valga, que o solicitaron en 2019 pero non quixeron realizar as actuacións ata este momento. En concreto, os 41 concellos que solicitaron melloras o ano pasado son: Moaña, Covelo, Ponte Caldelas, Arbo, Moraña, Vila de Cruces, Nigrán, Salvaterra de Miño, Oia, Portas, Silleda, Rodeiro, A Cañiza, Bueu, Sanxenxo, Soutomaior, Pazos de Borbén, A Lama, Valga, O Grove, Cambados, Meis, Poio, Tui, Lalín, Gondomar, Vilaboa, Caldas de Reis, Pontecesures, Ponteareas, Agolada, Salceda de Caselas, Vilagarcía, Mondariz, Pontevedra, Tomiño, Baiona, Illa de Arousa, A Estrada, Ribadumia e Vigo.
Este programa ten por obxectivo garantir a recuperación destas instalacións que, en ocasións presentan un estado de conservación defectuoso e co obxectivo de estender a súa vida útil. Para isto, a Deputación pon a disposición dos concellos persoal e maquinaria para poder manter en bo estado estes espazos.
