Imaxe de arquivo das reunións entre membros da Xunta sobre a FP
A Xunta publicou onte no Diario Oficial de Galicia (DOG) a oferta de ciclos de Formación Profesional nos réximes ordinario e modular para persoas adultas –presencial e a distancia– para o curso 2021/2022, que recolle 12 ciclos e 346 prazas novas na provincia de Pontevedra.
Deles, un é un ciclo de nova implantación, é dicir, que se oferta por primeira vez en Galicia e na provincia: o de grao medio en Guía no medio natural e de tempo libre. O alumnado poderá cursalo na provincia nos institutos de Poio, Plurilingüe Pintor Colmeiro (Silleda)e Plurilingüe Terra de Turonio (Gondomar)
Deste xeito, a Consellería de Cultura, Educación e Universidade oferta nos réximes ordinario e modular para adultos nos centros públicos da provincia de Pontevedra 9.683 prazas en primeiro curso en centros públicos (en números moi similares ao curso anterior), en 380 ciclos e programas formativos autorizados. Delas, 7.044 forman parte do réxime ordinario –2.727 en grao medio, 3.003 en grao superior, 1.134 en FP Básica e 180 en programas formativos para persoas con necesidades específicas de atención educativa–, mentres que outras 1.689 son do réxime modular para persoas adultas –738 grao medio e 951 en grao superior–, e 950 do réxime modular a distancia –200 en grao medio e 750 en grao superior–.
A modificación da oferta nace dun proceso de diálogo coa comunidade educativa, no que as peticións foron analizadas pola Inspección educativa dos centros, tendo en conta a oferta global de Galicia en cada ciclo, a demanda do alumnado, a inserción de cada ciclo e as necesidades do tecido produtivo.
Modificacións
Ademais das titulacións de nova implantación, como é habitual a oferta de FP flutúa para adaptarse ás necesidades do tecido produtivo e ás características da poboación de cada zona, o que supón unha oportunidade laboral para os titulados. Deste xeito, o novo mapa contempla cambios en diferentes centros, a maiores das novas incorporacións en materia de FP Dual.
Os cambios na provincia son os indicados no seguinte cadro:
| Réxime e modalidade | Concello | Centro | Grao | Ciclo | Cambio |
| Ordinario | Ponteareas | IES do Barral | Básico | Informática de oficina | Supresión |
| Ordinario | Ponteareas | IES Pedra da Auga | Básico | Informática de oficina | Incorporación |
| Ordinario | Tui | IES Indalecio Pérez Tizón | Básico | Informática de oficina | Incorporación |
| Ordinario | O Grove | IES Monte da Vila | Básico | Cambio | |
| Ordinario | Redondela | IES Pedro Floriani | Básico | Cambio | |
| Ordinario | Moaña | IES Plurilingüe A Paralaia | Básico | Cambio | |
| Ordinario | Poio | IES de Poio | Medio | Cambio. Transformación de ciclo LOXSE a ciclo LOE | |
| Ordinario | Lalín | IES Laxeiro | Medio | Instalacións eléctricas e automáticas | Supresión |
| Ordinario | Silleda | IES Plurilingüe Pintor Colmeiro | Medio | Cambio. Transformación de ciclo LOXSE a ciclo LOE | |
| Ordinario | Gondomar | IES Plurilingüe Terra de Turonio | Medio | Cambio. Transformación de ciclo LOXSE a ciclo LOE | |
| Ordinario | A Illa de Arousa | IGAFA Instituto Galego de Formación en Acuicultura | Medio | Operación subacuáticas e hiperbáricas | Incorporación |
| Ordinario | Nigrán | IES Escolas Proval | Superior | Sistemas de telecomunicación e informáticos | Supresión |
| Ordinario | Lalín | IES Laxeiro | Superior | Acondicionamento físico | Incorporación |
| Adultos presencial | Vigo | IES Ricardo Mella | Medio | Farmacia e parafarmacia | Incorporación |
| Pasa de adultos presencial a adultos a distancia | Ponteareas | CIFP A Granxa | Superior | Vitivinicultura | Cambio de modalidade |
| Adultos presencial | Ponteareas | CIFP A Granxa | Superior | Procesos e calidade na industria alimentaria | Incorporación |
| Adultos presencial | Vigo | CIFP Manuel Antonio | Superior | Hixiene bucodental | Incorporación |
| Adultos presencial | Vigo | IES Audiovisual de Vigo | Superior | Iluminación, captación e tratamento de imaxe | Incorporación |
| Adultos presencial | Nigrán | IES Escolas Proval | Superior | Asistencia á dirección | Incorporación |
| Adultos a distancia | Vigo | IES de Teis | Superior | Desenvolvemento de aplicacións multiplataforma | Incorporación |
| Adultos a distancia | Vigo | IES Ricardo Mella | Superior | Asistencia á dirección | Incorporación |
| Adultos a distancia | Pontevedra | IES Luis Seoane | Superior | Transporte e loxística | Incorporación |
Calendario de admisión
O prazo de presentación de solicitudes nos réximes ordinario e para as persoas adultas –presencial e a distancia– comezará o 25 de xuño ás 9 h. e prolongarase ata o 5 de xullo ás 13 h. A matriculación da primeira adxudicación de prazas comezará o 20 de xullo ás 9 h., ata o 26 de xullo ás 13 h. A continuación, unha vez se comproben as prazas que quedaron vacantes, procederase á segunda adxudicación de prazas, cuxo período de matrícula irá do 28 de xullo ás 9 h. ao 30 de xullo ás 13 h.
Canto á FP Dual, a presentación de solicitudes será entre o 25 de xuño ás 9 h. e o 2 de xullo ás 13 h. O período de selección por parte da empresa colaboradora e do centro educativo irá do 8 ao 14 de xullo, e as persoas finalmente seleccionadas poderán matricularse do 16 de xullo ás 9 h. ao 23 de xullo ás 13 h.
No caso dos másteres de FP, o prazo de presentación de solicitudes irá do 25 de xuño ás 9 h. ao 5 de xullo ás 13 h., e o de matriculación do 20 de xullo ás 9 h. ao 26 de xullo ás 13 h. O calendario detallado pode consultarse no Portal de FP.