A Deputación continúa avanzando para a recuperación de todo o tramo vello da estrada provincial EP-5002, na contorna da ponte románica das Achas, no concello da Cañiza. O tramo, de 560 metros, correspóndese co antigo percorrido, pois a Deputación inaugurou a finais de 2016 a variante que enlaza coa EP-5102 incluíndo a construción dun novo viaduto sobre o río Deva, obras que xa supuxeron un investimento de medio millón de euros.
O novo proxecto para a recuperación do tramo vello está valorado en 411.015 euros e xa está redactado, segundo avanzou o deputado da área, Gregorio Agís. O responsable provincial de Infraestruturas ironizou sobre a moción que o deputado do PP da Cañiza, Miguel Domínguez, vén de presentar ao Pleno provincial reclamando a restauración desta ponte. “Parece que reclama algo que xa se está facendo, aínda que reclama menos do que se está facendo, porque o proxecto redactado non só contempla a restauración da ponte, senón de todo o tramo vello entre os núcleos das Achas e da Ponte”. Por este motivo, anímao a preguntar e informarse antes de presentar mocións ao Pleno “e evitar así novos intentos fallidos de colgarse medallas, por non falar de estrepitosos ridículos”.
Agís destacou que o traballo da área provinciall de Infraestruturas continúa e o proxecto seguirá adiante e executarase de acordo coa planificación no mantemento, conservación e mellora da rede provincial de estradas. Ademais destacou que a interlocución da Deputación co alcalde da Cañiza, Luis Piña, está aberta permanentemente ao igual que cos 62 alcaldes e alcaldesas”, polo que a Deputación non precisa de “intermediarios” ou “axentes políticos” para sacar adiante as súas actuacións.
“Estamos a falar dunha obra que está acordada co alcalde da Cañiza, que é con quen falamos desde a Administración provincial; xa mantivemos unha reunión, o Concello xa está a traballar para a consecución dos terreos necesarios para a súa cesión, e este mesmo ano se firmará o convenio. Un proxecto, engadiu Agís, moito máis amplo que o que supostamente pide o deputado Domínguez que se refire só á ponte”.
Unha actuación integral
O proxecto elaborado pola Deputación para o acondicionamento dos 560 metros entre os núcleos das Achas e a Ponte, no concello da Cañiza, prevé unha actuación integral para a mellora da seguridade viaria entre estes dous núcleos, recuperando ademais, os valores patrimoniais da ponte das Achas, dado que pasará a contar de pavimento de lastra de granito, ademais da substitución das actuais varandas metálicas por un peitoril de pedra de 110 centímetros de altura.
Segundo o proxecto, no núcleo das Achas proxéctase unha zona de convivencia de tráfico rodado e peonil mediante unha plataforma elevada de formigón de cor gris escura, previo saneo do pavimento existente. O embelecemento da zona consistirá tamén na pavimentación con lastras graníticas dos sobreanchos da estrada. No contacto dos novos pavimentos coas vivendas disporase unha cenefa con lousas graníticas rectangulares. Ademais, enlazando coa plataforma elevada de preferencia peonil proxéctase unha senda ao longo da marxe dereita de 2,50 metros de ancho medio. Ata a zona da depuradora disporase unha cuneta de formigón practicable entre a senda e a calzada, que funcionará tamén como rega para as parcelas lindeiras. A drenaxe solucionarase en ámbolos dous treitos da senda cunha canalización soterrada de PVC de 400 mm de diámetro.
O proxecto, que inclúe tamén a aplicación dunha nova capa asfáltica, prevé que a circulación do tráfico rodado no acceso ao núcleo da Ponte quede restrinxido ao sentido de Oeste a Este. Con este fin ampliarase a zona verde existente na intersección e disporase unha sebe vexetal de buxos no linde coa senda. Tamén se contempla o alumeado da senda con novas luminarias led sobre columnas de 9 metros. Ademais se soterrarán as liñas de enerxía eléctrica e telefonía. A obra complétase coa disposición ao longo da actuación de banco de granito e asento de pedra.
