A mostra Serie Hollywood 2021, do artista e arquitecto José Romero-Amich, organizada pola Concellaría de Cultura de Redondela –que dende a súa inauguración recibiu xa máis de 500 visitantes–, permanecerá aberta ao público ata o 31 de xullo na sala 1 do Multiusos da Xunqueira.
A través de 18 lienzos de 80 por 90 cm, a exposición percorre a historia do cine norteamericano do século XX e XXI, abarcando filmes icónicos desde 1921 ata 2014. Así, todo aquel que se achegue poderá recoñecer nas súas obras, e entre outras, películas como The Kid, de Charles Chaplin, Casablanca, O Padriño, Matrix, Kill Bill, 007 contra o Dr. No, Os Paxaros, A Guerra das Galaxias, o Silencio dos Cordeiros ou a máis recente Interstellar, dirixida en 2014 por Cristopher Nolan.
O autor, José Romero-Amich, é un arquitecto vigués amante do cine e da pintura que atopou na pandemia unha oportunidade única para tomar tempo e crear esta serie que, segundo as súas propias palabras, “nace da necesidade creadora en relación ás imaxes recoñecibles colectivamente cuxo orixe está na industria estadounidense”. “Poderíamos aventurar que detrás destas míticas fotos escóndese quizá a máis efectiva exportación sociocultural desde o dereito ou a enxeñaría romanas”, conclúe Romero-Amich.
A exposición, inaugurada o pasado venres, 2 de xullo, segundo Daniel Boullosa, concelleiro de Cultura, “está a ser un éxito rotundo. Son xa preto de 500 persoas as que xa gozaron da mostra e quero animar a todos os que aínda non o fixeron porque, de seguro, van quedar gratamente sorprendidos tanto pola técnica empregada como polo que representa a mostra para os amantes do cinema”.
