A alcaldesa de Redondela, Digna Rivas, e a concelleira de Cultura, Iria Vilaboa, presentaron onte a programación cultural Inverno 2022 na que o Concello mantén a súa firme aposta polo teatro, tanto adulto como infantil e no que non faltan actividades xa plenamente consolidadas pola aceptación que teñen entre o público como o Ciclo de Monólogos, o ciclo de música folk ‘A nosa música’, o Festival Internacional de Bigs Bands ou o Festival Internacional de Curtas ‘Andaina’.
Dentro do programa, tal e como explicaba a alcaldesa Digna Rivas, inclúense actividades “que pola súa importancia lúdica, como é o Entroido; reivindicativa como os actos do 8 de Marzo ou tradicional como o Día dos Maios, desenvolverán un guión de actividades propias e diferenciadas que se darán a coñecer oportunamente”.
A alcaldesa, que destacou “o traballo realizado pola Concellería de Cultura para dar forma a un programa variado e con actividades para todos os públicos”, puxo o foco de atención pola “firme aposta” que se segue a facer dende o Concello polo teatro tanto adulto como infantil e destacou a presenza da compañía A Panadaría que elixiu Redondela para continuar coa xira de presentación da súa nova montaxe As que limpan.
O teatro infantil ocupa tamén un lugar destacado no programa coa representación, xa este vindeiro 6 de febreiro da montaxe de Perez&Fernández ‘Os nenos da Variola’ no Multiúsos da Xunqueira ás 18 horas. A alcaldesa salientou a importancia que ten o teatro entre o público máis pequeno “que esperta en eles o interese polas artes escénicas e que os encamiña a apreciar a que está considerada como unha das máis extraordinarias expresións culturais e artísticas”. “Esperar o interese nos nenos e nenas de hoxe, e conseguir manter o teatro vivo entre os adultos de mañá”, sinalou Digna Rivas.
No que aos actos máis inmediatos fai referencia, amais da xa sinalada posta en escena de ‘Os nenos da variola’, o 12 de febreiro no auditorio do multiúsos da Xunqueira e ás 20 horas, terá lugar a representación de As que limpan, coa que a compañía «A Panadaría» continúa a xira de estrea da súa nova produción. O prezo das entradas será de 3 euros
O 13 de febreiro, será a quenda do humor tamén no multiúsos da Xunqueira co monólogo de Xavier Deltell, ás 19 horas, dentro do ciclo Humor na súa Tinta. O prezo das entradas será de 12 euros.
Redondela presenta a súa programación cultural do Inverno 2022 na que os actos do Entroido e 8 de Marzo terán un especial relevo
LIBROS
A pegada de «Ronsel»
A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.
Dores Tembrás, «Enxertos»
A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades
Queridos Reis Magos…
Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.