O Concello de Redondela vén de poñer en coñecemento da veciñanza que esta vindeira semana darán comezo as obras de humanización da Avenida Santa Mariña. Os traballos para os que se destina un investimento de 450 686,84 con cargo ao Plan Concellos 2021 permitirán non só a transformación deste espazo urbano, unha das principais vías de entrada á vila, senón tamén á mellora da rede de subministro e saneamento.
A alcaldesa Digna Rivas salienta a importancia destas obras que “permiten a transformación dos espazos a fin de mellorar a mobilidade, as condicións de vida e dotar aos veciños e veciñas dos servizos aos que teñen dereito independentemente do lugar onde residan”.
As obras inclúen a instalación de sistemas de alumeado e sinalización, mobiliario urbano, canalizacións para saneamento e abastecemento, tubaxes para liñas de comunicación e condución eléctrica, mellora de beirarrúas e pavimentación.
O firme de todo o trazado obxecto das obras, nunha extensión de 680 metros cadrados, será pavimentado con aglomerado asfáltico de 6 cm de espesor. En ámbalas dúas beiras da rúa, instalaranse canalizacións para a recollida de pluviais que contarán con sumidoiros no lado sur e nos dous lados da rúa procederase á instalación integral da rede de abastecemento de auga potable.
Os traballos completaranse coa mellora integral das beirarrúas e a instalación de alumeado público que mellore, non só as condicións de luminosidade da zona senón que permitan unha mellora da eficiencia enerxética en canto ao consumo e emisións de CO2.
Finalmente, dotarase á zona da correspondente sinalización de tráfico, tanto horizontal como vertical e de mobiliario urbano (xardiñeiras, bancos, papeleiras e varandas).
Redondela iniciará esta semana as obras de humanización da Avenida Santa Mariña
Cun orzamento de máis de 450 000 euros as obras mellorarán unha das principais vías de entrada ao núcleo urbano
LIBROS
A pegada de «Ronsel»
A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.
Dores Tembrás, «Enxertos»
A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades
Queridos Reis Magos…
Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.