O Concello de Redondela comenza as obras, cun investimento de 287.507,36 €, para a mellora do espacio deportivo en Chapela despois do Nadal. Trátase, concretamente, do espazo coñecido como O Campito, unha zona moi utilizada pola infancia e mocidade da parroquia e que se atopaba en condicións bastante deficientes. Precisamente, lembra a alcaldesa Digna Rivas, a mellora do campito era unha das propostas que trasladou ao Concello o Pleno do Consello da Infancia e a Adolescencia.
De feito, o Concello renovou o contrato de alugamento que tiña sobre dito espazo deportivo –que remataba en maio deste ano– por outros trece anos de cara a poder realizar todos os traballos de mellora programados.
“Tralo Pleno do Consello da Infancia e a Adolescencia –explica a rexedora local– mozas e mozos transmitíronnos non só a necesidade de remodelar e mellorar o campito, senón que tamén puxeron sobre a mesa algunhas ideas moi interesantes para esa reforma e que agora se trasladarán á realidade”. Nese sentido, a alcaldesa redondelá gabou o traballo do Consello da Infancia e a Adolescencia “absoluta e decididamente implicados no traballo para facer chegar ao Goberno local todas cantas ideas poidan ser beneficiosas e útiles para a mocidade redondelá” e puxo como exemplo as propostas que con anterioridade fixeran sobre o skatepark de Redondela ou o espazo deportivo do antiga estación de Chapela.
Esto súmase as obras da Alameda Rosalía de Castro de Chapela, traballos que “permitirán a remodelación e mellora dun espazo céntrico amplamente utilizado pola veciñanza”, afirma a alcaldesa de Redondela, Digna Rivas. Lembra a alcaldesa de Redondela que lugares como o antigo apeadoiro de ferrocarril e a propia vía férrea pasaron de ser “lugares infrautilizados e cun impacto visual negativo, a espazos de ocio para a cidadanía transformándose nunha Vía Verde que, a día de hoxe, é un dos puntos clave para o desfrute das veciñas e veciños”.
Descrición pormenorizada do proxecto
A área destinada á intervención conta cunha superficie de actuación aproximada de 1.150 m² e comprende a zona deportiva situada ao norte da Alameda de Rosalía de Castro. A trama urbana está definida pola situación da vía férrea e a estrada PO-323 (Avenida de Vigo), que discorren paralelas e xeran un espazo entre elas no que se sitúa o proxecto. Ademais, é importante a Avenida José Fernández López que une a Alameda coa zona deportiva e ten unha gran carga de tráfico pesado. Ao suroeste da actuación existe un aparcamento ao aire libre que dá servizo á zona.
A zona deportiva mellorarase xerando un acceso mediante unha escaleira con bancada desde o lugar máis próximo á Alameda de Rosalía de Castro conéctase o espazo deportivo co resto da intervención, producindo un acceso directo tanto desde a propia Alameda como para os fluxos provenientes do sur e do oeste (pasarela sobre as vías do tren). Ao norte inclúese unha rampla que mellora a accesibilidade do espazo.
Unha zona verde vén resolver o salto de cota entre a Avenida José Fernández López e a esplanada existente, introducindo vexetación no ámbito. Tamén se proxecta unha zona verde baixo a pasarela, creando un pano de fondo para as pistas deportivas. Bancos e xardíns con céspede e flores delimitan e achegan vexetación á contorna. Establécese un camiño crebado e lonxitudinal que cose o espazo partindo do norte da parcela e desembocando no aparcamento, este paso delimita a zona de pistas deportivas e a zona de estancia. En pártea norte do camiño, acompañando á zona verde introdúcese un espazo pergolado cuberto parcialmente para protexer aos usuarios das inclemencias do tempo.
O muro de pedra existente ao sur das pistas se rejunta e limpa ademais de ser acompañado dunha estrutura de reixa electrosoldada co obxectivo de crear un fondo verde e ademais crear un fito visual, unha referencia. Remátase esa fronte cunha bancada de pedra.
Na zona destinada a pistas deportivas renóvanse os valados e insere unha bancada lonxitudinal ao oeste, servindo de separación da vía férrea e espazo de observación dos acontecementos que acolla o recinto.
Inclúese unha nova instalación de iluminación deportiva adecuada ao uso. Respecto a a evacuación de augas pluviais, renóvase a instalación mellorando o seu funcionamento.
Digna Rivas amosou a importancia dunhas obras que “como todas as que estamos a realizar e lavamos realizadas, van máis aló que simples lavados de cara e buscan a transformación dos espazos para o seu desfrute por parte da cidadanía e a mellora da súa calidade de vida”.