O Concello de Redondela, a través das concellerías de Servizos Sociais e Medio Ambiente, que xestionan a alcaldesa Digna Rivas e Alberto Álvarez, respectivamente, puxo en contacto a ámbalas dúas asociacións coa empresa galega ‘Redivivus’ especializada neste tipo de accións.
Redondela conta dende o ano pasado con catro colectores específicos para a recollida de tapóns de plástico, contedores claramente diferenciados de calquera outro pola súa forma de corazón e que serán xestionados polas asociacións Lenda e Andaina de cara a conseguir fondos que contribúan ao mantemento das súas actividades.
A posta en marcha destes catro primeiros colectores de tapóns, dos que dousestán instalados en Redondela e outros dous en Chapela, permiten que as asociacións Lenda, –dedicada a atender ás necesidades, formación e inserción de persoas maiores con discapacidade– e Andaina, –que fan a mesma labor pero con nenos e nenas–, “poidan obter uns ingresos adicionais e que as persoas da asociación desenvolvan unha actividade máis ao encargarse da xestión dos contedores e da recollida dos tapóns”, explica a alcaldesa Digna Rivas.
Éxito e continuidade
Despois de un ano en funcionamento, o éxito foi tal que as asociacións demandan un aumento no número de recolectores para continuar coas actividades. No que levamos de trimestre recolléronse xa un total de 4162 kg de plástico en Chapela e Redondela, case o dobre que o primeiro ano.
Joaquín Fernández, educador da Asociación Lenda explica que, “están desexando que poñan máis corazóns de reciclaxe. Na nosa asociación, o alumnado encargase de clasficar o plástico, unha actividade que axudou a concienciar sobre o medio ambiente e coa que os alumnos e alumnas acabaron collendo unha resposabilidade maior da que esperabamos. Adican 4 horas semanais á clasificación e fóra do horario lectivo están pendententes dos contedores para saber cando están cheos.” Fernández engadía que “outras asociacións e concellos chamaban para coñecer a iniciativa e mostraron interese. Nós explicamos o proceso, porque sabemos que esta é unha boa labor”.
A Concellería de Medio Ambiente, consciente da popularidade, encargarase de poñer a disposición de todos os veciños e veciñas da Vila máis recolectores. “Colocaremos polo menos dous recolectores máis de cara á nadal”, explica Alberto Álvarez.
A Asociación Andaina encárgase de recoller os tapóns, entre outras actividades. Así o explicaba Antonio García, presidente da asociación: “os exercicios resultantes desta iniciativa tiveron unha continuidade que nos sorprendeu. Soemos ir a recoller cada dúas semanas os tapóns. Os nenos e nenas collérono como un traballo máis e aprenden do proceso, porque saben que están facendo unha boa lobor”.
A alcaldesa Digna Rivas quixo trasladar ás dúas asociacións o agradecemento de toda a cidadanía de Redondela “polo seu traballo incansable e solidario a prol das persoas que máis o precisan, labor para a que sempre poderán contar coa colaboración deste Goberno”, concluíu.
