O Obradoiro de Estudos Locais Fernando Monroy presenta o vindeiro 4 de xuño na illa de San Simón o documental ‘Ostras. O peche do mar’, un traballo impulsado pola directiva da entidade e dirixido polo redondelán Fernando Carreira ‘Cuchi’. A peza audiovisual é unha análise do conflito vivido na parroquia entre finais de 1955 e inicio de 1956.
Naquel período, en plena ditadura, intentouse a creación dun parque ostrícola na praia de Cesantes, que atopou a oposición da veciñanza e estivo liderada polas mariscadoras, principais afectadas da parcelación do areal, xa que era unha fonte de ingresos fundamental nun tempos duros. Na peza recóllense testemuñas de protagonistas, información do iniciativa e, incluso, das institucións públicas que impulsaron o proxecto. A prensa da época recolleu uns feitos que conmocionaron o concello e nos que existiu unha gran participación veciñal.
O programa de actos dará comezo co traslado á illa de San Simón ás 15:30 horas para regresar ás 21:00. No medio realizárase un pase de ‘Ostras. O peche do mar’, e tamén está previsto unha homenaxe a todos os colaboradores da iniciativa, con especial atención as mariscadoras, algunhas en vida e outras, desgrazadamente, xa finadas. Actuará o grupo de Airiños de San Simón, do CCD de Cesantes, e Camerata da Ría. Está prevista a presencia de 300 persoas para seguir esta presentación, xa que se esgotaron os billetes para acudir á presentación. En todo caso, nas vindeiras semanas o Obradoiro de Estudos Locais Fernando Monroy realizará novos pases do documental para chegar a todos os interesados.