11.8 C
Pontevedra
Venres, 21 de Xuño de 2024
Máis
    HomeComarcasRedondelaO Concello de Redondela reafirma o seu compromiso coa diversidade cun amplo...

    O Concello de Redondela reafirma o seu compromiso coa diversidade cun amplo abano de actividades con motivo o Día da Memoria Trans

    Á inauguración da exposición 'Vigo es nombre de mujer' engádense outras actividades que este ano, por mor da Covid, reinvéntanse no seu formato

    “Redondela sempre apostou e apostará pola diversidade e a integración como medios para acadar unha sociedade máis xusta, máis solidaria e máis decente”. Con estas palabras, a alcaldesa de Redondela, Digna Rivas, daba a coñecer o amplo abano de actividades que se desenvolverán durante estes días con motivo do Día Internacional da Memoria Trans que se celebra o vindeiro 20 de novembro.

    O acto central desenvolverase no Multiúsos da Xunqueira onde ás 12 horas inaugurarase a mostra fotográfica, ‘Vigo es nombre de mujer’, unha mostra que fai un interesante percorrido pola memoria transexual da cidade olívica nas décadas dos 70, 80 e 90. A mostra, organizada pola asociación PVLSE, chega a Redondela logo das xestións realizadas pola asociación redondelá Irisar, que con pouco máis dun ano de vida, “desenvolve un marabilloso traballo a prol da diversidade”.

    Digna Rivas amosou o seu orgullo “de que unha redondelá e agora traballadora do Concello, Carolina Graña, sexa un dos rostros visibles das persoas trans na exposición ‘Vigo es nombre de mujer’. Unha muller que, coa súa valentía, amósanos día a día o camiño a seguir para acadar a unha sociedade igualitaria e xusta”.

    É evidente que a actual situación de pandemia, fai que as actividades cambien ou ‘reinvéntense’ respecto ás de anos anteriores e, en especial, non que atinxe a participación dos mozos e mozas dos catro institutos redondeláns. Así, as charlas que se desenvolvían co alumnado nos IES de Redondela, serán substituídas por unha iniciativa do propio alumnado que escribirá frases relativas á diversidade e á integración nos bancos instalados o pasado ano en cada centro, e pintados coas cores trans.

    Esas frase serán posteriormente difundidas polas redes sociais municipais como forma de facelas chegar a toda a cidadanía. As actividades, como explica a alcaldesa, “buscan concienciar á cidadanía sobre a diversidade e a imposibilidade que ten unha sociedade para avanzar, se non é a través da aceptación de liberdade individual de cada quen”.

    A alcaldesa de Redondela recoñece que, nestes últimos anos avanzouse moito en materia de diversidade “pero é un avance lento, a costa de grandes sacrificios”. Non se pode esquecer “que aínda a día de hoxe, en pleno século XXI e nunha sociedade que se autodenomina ‘avanzada’ as persoas trans sigan a ser obxecto de vexacións, agresións e mesmo vítimas de asasinato”, conclúe Rivas.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.