Xoán Carlos González, voceiro municipal do BNG de Redondela amosou a súa satisfacción “por teren conseguido o compromiso de que, nos vindeiros orzamentos, se recolla unha partida co fin de urbanizar esta estrada de acceso ao colexio de Portocabeiro, na parroquia de Vilar de Infesta”.
Un dos puntos que se levou ao Pleno do mes de abril prantexaba o convenio entre o Concello e a Deputación para a urbanización do treito final da estrada do Galleiro, na parroquia de Vilar de Infesta. Dun total de 400.000 € para a obra, as arcas municipais aportarían uns 120.000 €.
Segundo manifestou o voceiro do BNG, “xa sabemos a canto ascende o desvío de fondos públicos perpetrado polo PP de Javier Bas e Louzán quen dispuxeron de 1’2 millóns de euros para toda a obra, e deixaron un terzo da mesma sen executar”. Para sinalar que novamente, os populares amosaron a súa peor faciana, propoñendo que a obra quedara sen rematar.
No transcurso do debate, segundo o edil nacionalista, “prantexamos a necesidade de que o goberno municipal se compremetara a urbanizar e humanizar a estrada de acceso ao colexio de Portocabeiro. Unha demanda que dende hai anos tanto a comunidade educativa como a Asociación de Veciñ@s, teñen prantexado”, sinala.
Xustifica a súa decisión o voceiro do BNG, pois “ante a falla de orzamento deste Goberno, tal como se comprometeron no acordo de investidura de Digna Rivas como alcaldesa, non nos quedou máis remedio que prantexar a actuación na parroquia de Vilar”, aclara.
O vial sufre un importante movemento de tráfico pesado. “Consideramos que se trata dunha oportunidade para desenvolver os camiños escolares, para que se poida acceder e saír do centro educativo dun xeito seguro”, polo que lle damos grande valor a este compromiso.
