O BNG de Redondela vén de cuestionar o proceso de selección para que, menores con idades comprendidas entre 3 e 12 anos, poidan gozar das actividades organizadas polo Concello de Redondela. “Agardabamos que se modificase o actual proceso de selección, moi complexo, por outro máis sinxelo”, explica o portavoz municipal da formación nacionalista, Xoán Carlos González.
Lembra González que o sentido das Ludotecas, é facilitar espazos de convivencia e lecer de calidade aos cativos e cativas durante o verán, “apoiando o labor educativo das familias”. Recorda que a poboación infantil, tamén sufre os efectos da Pandemia, principalmente nos aspectos socializadores, polo que “estas actividades adquiren un papel moi relevante”.
Considera moi axustados os prazos de inscripción posto que entre o días 2 e 14 de xuño, somentes hai 6 días hábiles para presentar toda a documentación, motivo polo que o BNG redondelán pide unha ampliación do período de inscrición.
Doutra banda, os nacionalistas esixen ao Goberno municipal “que se poñan os medios necesarios para respostar ás demandas e necesidades de todas aquelas familias redondelás que queiran facer uso destas actividades de lecer” e formula a posibilidade de contar cos Centros Culturais das Parroquias, “que sempre colaboraron coas Ludotecas”.
Considera “engorroso e mesmo disuasorio, todo o proceso de selección, herdado dos tempos do Partido Popular”. Entende que o Goberno local debería apostar por un modelo “máis flexíbel e áxil, sen tantas restriccións”.
Sinala un novo erro na concepción das Ludotecas por parte do goberno, pois “non se considera como actividade laboral o emprego no fogar que realizan principalmente as mulleres, ao non terse en conta como criterio para que os seus fillos e fillas poidan disfrutar das Ludotecas”.
Remata na súa nota pedindo ao Goberno municipal de Redondela, “a eliminación de todos os requisitos para a inscripción nas Ludotecas de Verán, tendo en conta as verdadeiras necesidades dos nenos e nenas, e das súas familias”, remata na nota Xoán Carlos González.
