Dende este pasado venres Redondela acolle no Multiúsos da Xunqueira e ata o vindeiro 30 de xuño, a primeira exposición organizada e coordinada por Axentes do Cambio, o Grupo de Participación Infantil e Xuvenil do Concello de Redondela. Trátase dun traballo colaborativo que nace como resposta á invasión rusa de Ucraína e que baixo o título ben significativo de ‘Vidas perdidas’, pretende sensibilizar á poboación sobre as devastadoras consecuencias das guerras e de accións bélicas de todo tipo.
A través de carteis informativos e debuxos, os nenos, nenas e adolescentes que forman parte deste grupo, expresaron os seus pareceres sobre o drama humano que se deita detrás de decisións políticas e xeoestratéxicas que en nada atinxen ás persoas que as sofren.
Aos traballos realizados por este grupo, aos que destinaron parte do tempo das súas últimas xuntanzas quincenais, sumáronse os de varios centros de ensino do municipio –CEIP Igrexa, CEIP Alexandre Bóveda, CEIP de Reboreda, CEIP Quintela e IES Illa de San Simón–, que quixeron poñer o seu gran de area.
A alcaldesa, Digna Rivas e mais a concelleira de Xuventude, Olga García Ballesteros, acompañaron a estes rapaces e rapazas para ver o resultado dun traballo realizado “dende a sensibilidade e implicación do grupo para a concienciación da veciñanza”, asegurou a alcaldesa Digna Rivas.
Ademais dos centros de ensino, neste traballo implicáronse por propia iniciativa as bibliotecas municipais, deseñando cadanseu centro de interese con libros e outros documentos das súas coleccións nos que se denuncian as guerras e os danos irreversibles que provocan.
Inauguración de «Vidas perdidas» exposición organizada polo grupo de Participación Xuvenil e Adolescente ‘Axentes do Cambio’
Un extraordinario traballo dos rapaces e rapazas busca sensibilizar á cidadanía sobre as devastadoras consecuencias da guerras e das accións bélicas de todo tipo.
LIBROS
A pegada de «Ronsel»
A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.
Dores Tembrás, «Enxertos»
A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades
Queridos Reis Magos…
Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.