Falece un guindastrista ao quedar atrapado entre o seu vehículo e un muro cando descargaba un coche en Redondela. Os servizos sanitarios só puideron confirmar o seu falecemento.
Faltaban dez minutos para as 9 horas cando os xestores do 112 Galicia recibiron a chamada de varios particulares que estaban nas proximidades do taller da parroquia de Quintela no se produciron os feitos. Estes informaron que o home implicado quedou atrapado entre o seu guindastre e un muro cando estaba a descargar un coche.
Desde o 112 Galicia activouse un operativo que contou coa participación de Urxencias Sanitarias de Galicia-061, dos Bombeiros de Redondela, do GES de Mos e dos axentes da Policía Nacional e Local. Tamén se informou aos Bombeiros de Vigo e de Porriño e aos membros da Agrupación de Protección Civil de Redondela.
Unha vez no punto, o persoal sanitario confirmou o pasamento do home e, nestes momentos, os servizos de emerxencias proceden coa liberación do corpo.
