O Obradoiro de Estudos Locais Fernando Monroy presentou o pasado sábado na illa de San Simón o documental ‘Ostras. O Peche do mar’. O acto contou con 300 persoas que encheron o auditorio e, entra elas, algunhas das protagonistas deste capítulo da historia de Redondela acontecido na praia de Cesantes entre finais de 1955 e inicio de 1956.
Naquel período, en plena ditadura, intentouse a creación dun parque ostrícola, que atopou a oposición da veciñanza e estivo liderada polas mariscadoras, principais afectadas da parcelación do areal, xa que era unha fonte de ingresos fundamental nun tempos duros. Ante as 300 persoas que acudiron a presentación, entre elas a alcaldesa da Redondela Digna Rivas entre outras autoridades, atopábanse protagonistas directos daqueles feitos e familiares de mariscadoras que, desgrazadamente, xa finaron. Un dos momentos máis emotivos foi a entrega dunha agasallo conmemorativo a todos eles. Tamén recibiron o detalle os membros do CSIC, que colaboraron na elaboración do documental con testemuñas e a aportación de documentación chave, e o director Fernando Carreira ‘Cuchi’.
O programa comezou co traslado ata San Simón. A chegada actuou o grupo de gaitas Airiños de San Simón do CCD de Cesantes, que recibiu ós presentes. Durante o acto de presentación puxo a música o cuarteto de corda Camerata da Ría. Interviñeron Manuel López (documentalista do documental) e a alcaldesa de Redondela, Digna Rivas. Pasouse a peza audiovisual e despediuse a todos os participantes.
Nos vindeiros meses, o Obradoiro de Estudos Locais realizará máis presentacións de ‘Ostras.O Peche do mar’ en Redondela xa que moitos interesados non puideron acudir a San Simón porque se esgotaron as 300 prazas dispoñibles. O documental xa está a venda nos puntos habituais ó longo do municipio para todas as persoas que desexen adquirir unha copia. Este é o terceiro documental do Obradoiro Fernando Monroy.
