A Organización de Produtores de Pesca Fresca do Porto de Vigo (OPPF-4), organiza mañá venres ás 12:00 horas, no Mercado de Abastos de Redondela, unha degustación gratuíta a base de distintas preparacións de raia e rape para que os consumidores coñezan de primeira man a marca de peixe “Fresco & Salvaxe” que está presente xa en mercados das peixarías de Vigo e a súa área metropolitana.
O produto baixo a marca Fresco e Salvaxe garante que o peixe foi capturado no mar mediante pesca extractiva tradicional e que nunca foi conxelado, tan só refrixerado, nin provén de piscifactoría. En conclusión, este selo deixa claro en supermercados e prazas de abastos, nunha soa lectura, a procedencia salvaxe do peixe para diferencialo do peixe de acuicultura ou conxelado.
Esta acción está organizada pola Organización de Produtores de Pesca Fresca do Porto de Vigo (OPPF-4), coa colaboración da Conselleria do Mar, o Fondo Europeo e Marítimo da Pesca (FEMP) e o Concello de Redondela.
O selo “Fresco & Salvaxe”, que se atopa en pleno proceso de expansión, chegará ao Mercado de Ponteareas nas próximas semanas.