A alcaldesa de Redondela, Digna Rivas, asistiu na mañá de hoxe, no Multiúsos da Xunqueira, ao inicio dos cursos de uso das novas tecnoloxías, unha iniciativa conxunta das concellerías de Novas Tecnoloxías e Persoas Maiores, xestionadas por Olga García Ballesteros e Iria Vilaboa, respectivamente, e que conta coa colaboración da ONG Amigos de Galicia.
A actividade agradeceu ás persoas participantes “o interese con que foi acollida esta iniciativa” e as animou a “aproveitar toda a potencialidade que ofrecen as novas tecnoloxías nun mundo cada día máis dixitalizado e no que os trámites online adquiren unha extraordinaria importancia”.
Rivas lembrou a aposta do seu Goberno “polas persoas maiores e por todas as iniciativas que contribúan a mellorar a súa calidade de vida” e reafirmou o seu compromiso “decidido” cun sector de poboación “que fixo de Redondela o que é hoxe en día e que aínda ten moito que aportar á sociedade”.
Os obradoiros, cun total de 12 horas lectivas distribuídos en tres clases de catro horas, permiten ás e aos participantes adquirir coñecementos sobre o funcionamento das máquinas de quendas dos centros oficiais (Concello, centro de saúde, etc…), utilización dos caixeiros automáticos das entidades bancarias, sacar o máximo aproveitamento das funcionalidades do seu teléfono móbil e, en especial, á aplicación do Sergas que permite desenvolver todos os trámites sanitarios precisos, dende solicitar unha cita médica, a coñecer a medicación activa de cada paciente.
Trátase, polo tanto, de ofrecerlle unha axuda práctica sobre dispositivos vinculados ás novas tecnoloxías que son de uso cotiá e saber como facer uso do caixeiro automático, de uso case que obrigado, ou como coller quenda nas máquinas que existen en case que todos os organismos públicos.
Aínda que as clases xa comezaron, segue aberta a inscrición no Multiúsos da Xunqueira de Redondela e no Multiúsos do Piñeiral do Crego de Chapela e se farán grupos coas persoas anotadas para seguir realizando cursos que adquiren, nestes tempos, unha importancia máis que salientable.
Comezan os cursos de aproveitamento das novas tecnoloxías dirixidos ás persoas maiores
LIBROS
A pegada de «Ronsel»
A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.
Dores Tembrás, «Enxertos»
A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades
Queridos Reis Magos…
Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.