A Policía Local de Redondela investiga a un condutor por un presunto delito contra a seguridade viaria

Axentes da Policía Local de Redondela procederon, na pasada fin de semana, a instruír as correspondentes dilixencias contra o condutor dun vehículo que, a maiores de infrinxir numerosas normas de circulación, achegou datos falsos aos axentes cando foi identificado polo que tamén pode haber un presunto delito de usurpación de identidade.

Os feitos aconteceron cando unha patrulla da Policía Local redondelá atopábase intervindo nun accidente de tráfico na N-550 á altura da intersección doa rúa Subida Estación ás 23:15 h. Nese momento, os axentes observaron un vehículo sen as luces regulamentarias que circulaba en dirección Vigo e que, amais, foi recoñecido polos axentes por haber estado implicado, días atrás, nun feito delictivo na vila.

Nun primeiro momento, o condutor fixo caso omiso ás indicacións dos axentes de deter o vehículo se ben, posteriormente, detívose uns metros máis adiante. No proceso de identificar ao autor dos feitos, este aportou datos faltos, polo que tamén se pode dar un presunto delito de usurpación de identidade.

Os axentes, coa colaboración do GOR (Grupo Operativo de Resposta) da Policía Nacional, procederon seguidamente á levantar a correspondente denuncia por circular sen alumeado regulamentario, carecer de seguro, non ter pasada a ITV, non levar o cinto de seguridade, dar positivo na proba de alcoholemia e, ao mesmo tempo, trasládanse dilixencias ao Xulgado de Guarda de Redondela por tratarse dunha persoa que nunca obtivera o permiso de conducir.

Do mesmo xeito, o acompañante foi denunciado ante a Subdelegación do Goberno en Pontevedra por tenencia de substancias estupefacientes, portar arma blanca e un bastón de considerables dimensións.

Esta non sería a única actuación da Policía Local nesta fin de semana xa que, na mañanciña do domingo e acompañados por efectivos da Policía Nacional, tiveron que acudir –a requirimento da veciñanza– a un bar da vila no que se atopaban preto de 40 persoas tanto no seu interior coma no exterior, consumido e incumprindo o horario establecido pola Xunta de Galicia ante a alerta sanitaria.