13.8 C
Pontevedra
Martes, 27 de Febreiro de 2024
Máis
    HomeO CondadoPonteareasPonteareas únese baixo o mesmo paraugas para reivindicar os dereitos das persoas...

    Ponteareas únese baixo o mesmo paraugas para reivindicar os dereitos das persoas con discapacidade

    A celebración do Día Internacional das Persoas con Discapacidade contou tamén cunha andaina solidaria

    Ponteareas sumouse á campaña de sensibilización ‘Baixo o mesmo paraugas’ para conmemorar o Día Internacional das Persoas con Discapacidade e seguir reivindicando unha inclusión real. Membros de ADAPTA e COGAMI concentráronse diante do Concello xunto á alcaldesa, Cristina Fernández Davila; a membros da Corporación municipal; a presidenta da entidade ADAPTA, Montserrat Cuevas; e ao presidente da Federación COGAMI Pontevedra, Ángel Holguera, durante a lectura do manifesto que servía de arranque a unha programación de actividades coas que visibilizar esta realidade e reclamar medidas que garantan os dereitos das persoas con discapacidade para estar en igualdade de condicións co resto da sociedade.

    A reforma e actualización da Constitución no que se refire á protección e promoción das persoas con discapacidade “dota dun novo contido ao artigo 49 con arranxo aos conceptos, valores e propósitos que hoxe configuran un entendemento e práctica apropiados dos dereitos e deberes das persoas con discapacidade,  incluídas mulleres e nenas, ás que nomean expresamente”. Non obstante, como salientou a alcaldesa na lectura do manifesto, é momento de dar un paso máis e traballar “para perfeccionar o texto de partida e apoiar á primeira reforma social da Constitución española, que vén da man das persoas con discapacidade e das súas familias e que non pretende senón facer do noso país un proxecto máis suxestivo e decente de vida en común”.

    Coa lectura do manifesto reivindicáronse os dereitos das persoas con discapacidade. Como explicou a presidenta de ADAPTA, “como parte valiosa da familia humana e das comunidades sociais e políticas nas que esta se organiza, as persoas con discapacidade deben ter reflexo nas Constitucións dende un enfoque esixente de dereitos humanos, que garanta a súa inclusión, participación e benestar, sen discriminacións nin relegacións de ningún tipo”.

    Esta xornada conmemorativa completouse cunha andaina solidaria dende o Regato da Venda, ao carón das pistas do pavillón municipal Álvaro Pino, ata o Centro Asprodico, onde a Asociación de Persoas con Discapacidade das Comarcas do Condado e Paradanta (ADAPTA) realiza as súas actividades e presta os seus servizos. A andaina, aberta a toda a veciñanza, remata coa plantación dunha árbore nas instalacións de Asprodico como símbolo do proxecto que a entidade está iniciando e que agarda que creza co tempo.

    LIBROS

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.

    Fran Fernández Davila, «Groenlandia»

    A Fran Fernández Davila gústalle sorprender cos seus traballos literarios, descolocar ao lector para levalo por paisaxes pouco transitadas física e emocionalmente, escapar da rutina diaria e, cunha forte carga de imaxinación, argallar historias nas que a intriga e o humor acaban por se converter en personaxes convidadas da trama.