O Concello de Ponteareas resolve a concesión de axudas municipais de apoio ao estudo para o curso 2023/2024. En total, esta medida beneficiará a 163 alumnos de diferentes niveis educativos como Infantil, Primaria, Formación Profesional Básica, ciclos formativos e Bacharelato.
Esta axuda do Concello permite ás familias do municipio con ingresos limitados adquirir material escolar e comprar os libros de texto que o alumnado precisa. O concelleiro de Educación, Ricardo González, apunta que o obxectivo é responder ás necesidades dos alumnos e das alumnas da vila, “xa que apostamos pola educación como un dos principais elementos de transformación do noso municipio”.
O edil avanza que “con esta resolución, as contías abonaranse nun breve prazo de tempo” e explica que houbo solicitudes que quedaron fóra desta convocatoria por mor de diferentes motivos como superar o nivel de renda ou non presentar a documentación que se requiría para este tipo de axuda, entre outras cuestións.
