A concellería de Cultura, que dirixe Hortensia Bautista, vén de informar que a finais de maio estarán rematadas as obras de mellora da eficiencia enerxética no edificio da Biblioteca e Museo Municipal, obras que contaron cun investimento de 154.678,31€, e que foron financiados polos Fondos Europeos de Desenvolvemento Rexional dentro da estratexia ‘Ponteareas, Hábitat saudable’.
Para seguir ofrecendo este servizo, a Concellería de Cultura mantivo abertas as instalacións da biblioteca e ampliou o horario que, dende que comezaron as obras, abre de luns a venres de 08:00 horas a 23:00 horas e os sábados de 10:00 a 13:30 horas e de 16:30 a 20:00 horas.
“A biblioteca está aberta ata as once da noite para que os usuarios e usuarias gocen dunhas horas de silencio sen as molestias das obras. A biblioteca é un servizo moi demandado donde a mocidade ven estudar e tamén realizar traballos nos ordenadores”, explica Hortensia Bautista.
Estas obras permiten a redución da demanda de calefacción e con isto o consumo de combustible, ademais de protexer fronte a auga, evitar problemas de fisuración, reducir as emisión de CO2 e evitar as perdas de calor.
Entre as obras que se executaron están a mellora do aillamento térmico na cuberta do museo, na da biblioteca e na da biblioteca infantil, cambio da iluminación da biblioteca por sistema led e instalación de sensores de presencia e reguladores de luz en función da luz natural.
Por último, separouse a estrutura metálica da cuberta do museo da fachada para evitar dilatacións e a fisuración da fachada que tamén será pintada ao igual que a fachada do museo.
“Con estas obras melloraremos un dos espazos públicos con máis usuarios e usuarias ofrecéndolles un lugar agradable e silencioso para traballlar. Seguindo as directrices de “Ponteareas, Hábitat Saudable” as obras permitirán un aforro no consumo de calefacción e iluminiación ademais dunha menor contaminación coa reducción das emisións de CO2 facendo deste espazo un lugar confortable axeitado para o estudo”, rematou a concelleira.
