O vindeiro sábado, día 19 de agosto, a praia fluvial da Freixa, en Ponteareas, acollerá a VII edición da clásica travesía a nado “Vila do Tea”, que forma parte este ano, de novo, tanto do circuíto galego como da Copa de España de augas abertas.
O evento vai crecendo en cada edición e, este ano, o Club Natación Ponteareas incluíu unha charla técnica o venres con especialistas da disciplina o, entre os que están o actual campión do mundo de aquatlon.
Xa o sábado, e de forma paralela ao evento deportivo, o público poderá gozar dun mercadillo de artesanía, música e animación e zona de cantina para toda a familia na praia da Freixa.
As probas comezarán ás 10 horas coa saída da categoría Máster, ás 11:45 h está prevista a saída da proba elite e ás 13.45 h a proba de relevos poñerá o punto final a esta gran cita acuática.
En metade haberá tamén distancias para outras categorías e probas de natación inclusiva. A organización repartirá máis de 2000 € en premios, o que atraerá a nadadores do máis alto nivel.
Na parte masculina, o vigués do RC Canoe, Miguel Martínez, tratará de revalidar vitoria, pero terá ao experto nadador internacional portugués Hugo Ribeiro e aos nacionais Mario Méndez (Rías Baixas) e Lucas Costa (CN Ponteareas) como rivais directos para conseguir a vitoria.
Nas mulleres, daranse cita a gaditana Irene Peiteado (campioa da Copa de España de augas abertas 2022), a asturiana do CN Ponteareas Alba Ortiz, gañadora do circuíto galego de augas abertas 2022, e a nadadora do CN Getxo, Itxaso Alonso, especialista destacada da disciplina.
