O Concello continúa co seu labor de orientación laboral a todos os mozos de Ponteareas e da comarca. O Departamento de Orientación Laboral, dependente da Concellería de Formación e Emprego dirixida por Vanesa Fernández, acudiu de novo ao EFA A Cancela para unha nova charla de asesoramento vocacional e formativo ao alumnado de diferentes ciclos.
Nesta ocasión, a orientadora laboral, Isabel Illán, achegouse ás instalacións do centro para explicar ao estudantado da rama de administración os aspectos máis relevantes a ter en conta no funcionamento do Servizo Público de Emprego Estatal e Autonómico (SEPE), así como as distintas actividades, obradoiros e programas aos que poden ter acceso para complementar a súa formación ou comezar a súa andaina laboral.
Para a concelleira estas charlas “son fundamentais para abrir o abano de posibilidades formativas e laborais aos rapaces e rapazas, que en moitas ocasións non saben todos os recursos que poden ter ao seu alcance e precisan a alguén que os guíe no camiño”.
Vanesa Fernández anima a acudir ao Centro de Desenvolvemento Local e solicitar cita coa orientadora a todas aquelas persoas que precisen información sobre a realidade laboral e as diferentes posibilidades formativas e profesionais.
