12 C
Pontevedra
Venres, 29 de Marzo de 2024
Máis
    HomeO CondadoPonteareasPonteareas aproba a creación dun novo parque público na Avenida Sarmiento Rivera

    Ponteareas aproba a creación dun novo parque público na Avenida Sarmiento Rivera

    O Goberno municipal do BNG-PSOE aprobou este luns en Xunta de Goberno a autorización para a creación dun novo parque público de case 3.000 metros cadrados na Avenida Sarmiento Rivera, nunha parcela situada nas proximidades do cuartel da Garda Civil da localidade.

    As obras iniciaranse xa a vindeira semana e non terán custo para o Concello de Ponteareas, xa que se trata dunha obriga dos propietarios dos terreos recollida no Plan Xeral de Ordenación Municipal (PXOM) para poder desenvolver o resto da área con usos comerciais. Ademais, unha vez rematado o acondicionamento, os promotores cederán o parque en propiedade a favor do Concello.

    Este novo espazo de lecer terá 2.775 m2, zonas verdes e axardinadas, arborado, mobiliario urbano como bancos, fontes ou papeleiras, iluminación e zonas de paseo, ademais dun grande estanque con fontes. Tamén se inclúe nas actuacións a rehabilitación dunha antiga edificación de 160 m2 situada neses terreos e que será destinada a un novo equipamento municipal. Unha parte do arborado será o xa existente no terreo, con exemplares de gran porte e de interese botánico. O proxecto do parque foi redactado polo promotor coa supervisión do goberno e técnicos municipais. O vindeiro xoves, ás 20 horas, o proxecto será presentado á veciñanza nun acto no salón de plenos do Concello.

    Unha vez entregado o parque ao Concello, os propietarios dos terreos colindantes prevén desenvolver os seus usos comerciais e obter os permisos para crear un grande equipamento comercial no ámbito da alimentación, que dinamizará esta zona, creando ademais emprego e riqueza.

    O proxecto do parque está ligado a outras dúas iniciativas que o goberno local dará a coñecer en detalle nas vindeiras semanas: a humanización do resto da Avenida Sarmiento Rivera dende a rotonda da zona das Pombas até a rotonda situada detrás do Concello e a humanización da rúa Curuxeira que conecta a Avenida Sarmiento Rivera coa rúa Redondela.

    A alcaldesa de Ponteareas, Cristina Fernández, salientou que “agora comezamos a ver os enormes efectos positivos derivados da aprobación do PXOM, pois Ponteareas contará en breve cun novo parque público sen custo algún para a veciñanza”. Fernández amosouse moi satisfeita porque “estamos convertendo Ponteareas nunha vila fermosa pensada para as persoas, máis saudábel e sostíbel e comprometida na loita contra o cambio climático”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.