O Concello alerta de que o centro de saúde de Ponteareas atópase sumido nunha situación crítica debido á falta de persoal médico, unha situación xa delicada que verase agravada coa chegada das quendas de vacacións para todo o persoal sanitario e facultativo.
Dos 15 médicos que debería haber no centro de saúde por número de tarxetas sanitarias, na actualidade están en activo 6 e outros catro facultativos de baixa médica e por maternidade.
Dende verán de 2021 suprimiuse a quenda de tarde e na actualidade máis de 8.000 persoas non contan con médico asignado, o que implica que cada vez que precisan asistencia sanitaria son incluídas en cupos de diferentes profesionais, o que non permite realizar un seguimento axeitado dos doentes. “Esta situación pon en perigo a saúde e a vida dos nosos veciños, xa que non se fai a prevención necesaria nin o correcto seguimento das enfermidades crónicas e cada vez que unha persoa que precisa ir ao médico deben decidir se acudir a urxencias, se lles chega cunha consulta telefónica ou se poden agardar semanas para ser visto por un facultativo que cambia cada vez”, lembra Cristina Fernández.
A pesar das ofertas anuais de prazas para os novos médicos residentes (MIR) ou traslados, non hai persoal que escolla as prazas vacantes. Unha situación que se agrava tamén coa rotación constante dos traballadores, tamén do persoal administrativo.
