A asemblea de Ponte Solidario asegurou onte “levar meses” informando á concelleira de Benestar Social do Concello de Ponteareas sobre as problemáticas das listas de espera dos Servizos Sociais locais. As persoas que acoden a este servizo de xestión exclusivamente municipal, explica a asociación “atópanse con citas que se demoran máis de tres meses para a solicitude dunha axuda de emerxencia”. Esta realidade está a afogar ás familias cun grao de vulnerabilidade social e económica moi elevado.
Ponte Solidario leva anos denunciando a carencia de recursos materiais, humanos e económicos dos Servizos Sociais comunitarios e a Concellería responsable non aporta solucións concretas. Entre as demandas do colectivo social está a contratación doutras figuras técnicas que complementen aos actuais perfís profesionais e que garanta os dereitos de inclusión da cidadanía. Ademais, dende o colectivo reclaman que a lista de espera nun servizo de urxencia como son os Servizos Sociais non pode demorarse máis de corenta e oito horas.
Ponte Solidario, que participa xunto aos partidos do goberno municipal na Plataforma pola Sanidade Pública do Condado-Paradanta, solicita “coherencia” á hora de defender uns servizos públicos de calidade. “Da mesma forma que se reivindica a redución das listas de espera na atención primaria –afirma a Asociación– non se pode tolerar que persoas con problemas socioeconómicos graves teñan que agardar meses para ser atendidas polos servizos sociais”.
O colectivo entende que os dereitos sanitarios e de servizos sociais “deben ser unha prioridade para calquera administración pública”. Sen Sanidade Pública e Servizos Sociais Públicos de calidade “estamos atentando contra dereitos humanos fundamentais e deixando no camiño a moitos veciños e veciñas”, afirman.
O colectivo social anuncia mobilizacións na vila ata conseguir o obxectivo de que “todas as unidades de convivencia que soliciten unha cita en Servizos Sociais teñan garantida a atención en menos de corenta e oito horas”.
