O Partido Socialista de Ponteareas quere agradecer aos cidadáns o apoio recibido nestas eleccións Xerais, xa que o PSOE volveu a ser a primeira forza política en Ponteareas cun 29,85 % dos votos frente a un 25,95 % do Partido Popular. “As eleccións voltaron amosar unha maioría de esquerdas, progresista que confía no Partido socialista para avanzar en igualdade, en dereitos sociais e en oportunidades” sinala PSOE ponteareán.
Dende o PSOE de Ponteareas desexan transmitir tamén unha mensaxe de serenidade. Todos os partidos políticos saben que é preciso un goberno no noso país, e haberá un goberno de esquerdas, liderado polo Partido Socialista que permita que a nosa vila poida seguir medrando.
A este respecto o presidente da Xestora do PsdeG-PSOE de Ponteareas, Alfonso Porto, afirma que “nestas semanas reiniciaranse novamente os contactos con Madrid para continuar cos tres grandes proxectos pendentes para Ponteareas: a seguridade vial na nacional 120, a depuradora que permita o saneamento de parroquias como Ribadetea e a seguridade vial no entorno do colexio Ramiro Sabel”. “Ponteareas volve a ter a oportunidade de avanzar e non a deixaremos pasar”, conclúe Porto.
