O Goberno ponteareán aclara que os datos de recadación aportados polo PP “son falsos”

Segundo os populares, o Concello recadara nos últimos meses 215.000 euros en multas á hostalaría cando o ingresado por sancións alleas ao tráfico en 2020 ascende só a 3.361 euros

O Goberno Local de Ponteareas, a través do seu concelleiro de Bo Goberno, Transparencia e Participación Cidadá, Roberto Mera, deu a coñecer os datos oficiais de recadación de sancións durante o ano 2020, desmentindo de plano os datos feitos públicos recentemente polo Partido Popular.

Os populares aseguraron nunha nota pública que o Concello de Ponteareas recadara “preto de 400.000 euros por sancións”, engadindo que “nos últimos meses recadouse máis de 215.000 euros en sancións a negocios de hostelaría”. Por último cifraban en 150.000 euros a recadación por sancións de tráfico.

Segundo os datos oficiais do servizo de recadación de sancións do Concello de Ponteareas no ano 2020 recadáronse por sancións alleas ás infraccións de tráfico 3.361,04 euros. Nelas inclúense ademais das multas relativas a negocios de hostalaría tamén outras como venda ambulante, limpeza viaria, venda de alcohol a menores ou tenza de animais perigosos. “Afirmar publicamente que o Concello recadou nos últimos meses máis de 215.000 euros por sancións á hostalaría cando a recadación allea ás multas de tráfico ascende a 3.361 euros é dunha gravidade extrema”, advirte Roberto Mera quen esixe aos populares “unha rectificación inmediata e pública por difundir información falsa”. Ademais, Mera esixe ao PP que aclare “en que fonte de información se basearon para dar esas cifras falsas. Deben unha explicación á cidadanía e a este Concello e agardamos que se dea en breve”.

En canto á recadación por infraccións de tráfico no ano 2020 ascende a 154.913,92 euros. Esta cifra é inferior á recadación do ano 2013, cando baixo o goberno do Partido Popular, o Concello recadou 157.229,18 euros por multas de tráfico e é moi semellante á do ano seguinte 2014 cando tamén con Salvador G. Solla como alcalde, a recadación ascendeu a 153.864,35 euros. “A recadación por multas de tráfico en 2020 está dentro do habitual nos últimos anos con gobernos de diferentes cores políticas, polo que resulta inadmisíbel que se fale de persecución á veciñanza”.

Mera sinalou que “é moi perigoso e dunha irresponsabilidade gravísima que un partido defenda aos que infrinxen as normas de convivencia. Denunciar e sancionar a aqueles que non respectan as normas non é perseguir a ninguén, é protexer os dereitos de todos os demais”, lembrou o concelleiro de Bo Goberno, Transparencia e Participación Cidadá. Mera engadíu que “xa non estamos nos tempos nos que os alcaldes poñían ou quitaban multas; hoxe en día ningún político pode dar instrucións ás forzas de seguridade sobre o que deben ou non sancionar, estamos nun Estado de dereito no que os axentes actuan sometidos unicamente ao imperio da Lei e onde os cidadáns sancionados poden pedir a tutela dos tribunais se consideran inxusta unha sanción”.