A alcaldesa, Nava Castro e o tenente de alcalde, Juan Carlos González, visitaron xunto ao deputado provincial, Alejandro Lorenzo, o parque de bombeiros logo de que a administración local duplicara o orzamento para este servizo de emerxencias. Na actualidade, destínanse 320.000 euros grazas a un novo convenio entre o Concello, Deputación de Pontevedra e Xunta de Galicia, fronte aos 155.000 euros de anos anteriores.
O novo acordo permite incrementar o número de efectivos ata os 16. Ademais, o persoal reforzarase tamén durante a tempada na que se rexistra un maior risco de sufrir incendios forestais. Deste xeito, o servizo contará con tres profesionais en cada quenda, mellorando a calidade de atención aos veciños e as veciñas e garantido un correcto descanso para os traballadores e traballadoras.
A alcaldesa, Nava Castro, apunta que “este convenio entre as tres administracións é unha nova mostra dos bos resultados que acadamos cando traballamos de forma conxunta co único interese de ofrecer uns mellores servizos municipais” así como que “reforzamos un dos servizos prioritarios para o Concello como é o de Emerxencias, superamos o dobre da contía inicial e dotamos dos recursos necesarios para facer fronte ás situacións de risco”.
O tenente de alcalde e edil de seguridade, Juan Carlos González, indica que “tiñamos claro que era urxente reforzar este servizo que atende non só á veciñanza de Ponteareas se non que tamén á de Salvaterra, Mondariz, Mondariz-Balneario, As Neves, Arbo, Crecente, A Cañiza e Covelo polo que puxémonos a traballar neste novo convenio para materializalo o antes posible”. Deste xeito, “contaremos durante todo ano con 16 profesionais que darán cobertura á veciñanza e na tempada onde existen máis posibilidades de que se produzan incendios forestais aumentarase ata os 17, trátase de estar á altura do que necesita a nosa vila”. Ademais, puxo en valor o traballo dos profesionais do servizo “son os mellores da contorna e tiñan que dispoñer dos mellores dos recursos”.
