O Concello de Ponteareas vén de adxudicar 70.000 euros en axudas ás traídas de augas veciñais de 7 parroquias para a mellora das instalacións durante o 2021. A través destas subvencións en réxime de concorrencia competitiva, o goberno municipal busca colaborar coas Comunidades de Usuarios de Augas de Consumo “para que realicen investimentos nas traídas veciñais que redunden na melloría do servizo, que sirvan para fomentar o asentamento no rural, para promover o emprego local e para dinamizar o asociacionismo veciñal na nosa vila”, como destacou a alcaldesa Cristina Fernández Davila.
Na web municipal pode consultarse a resolución provisional destas axudas, que cobren ata o 80% do investimento a realizar cun límite de 18.000 euros por traída. Nesta convocatoria recibíronse un total de 18 solicitudes, das que finalmente foron aprobadas as presentadas polas comunidades de augas de Cumiar, Santiago de Oliveira, Coelleira Rebordiños, Outeiro Guláns, Arcos, Ballea-Prado e Guillade de Abaixo.
Estas axudas fináncianse con fondos propios do Concello e comezaron a adxudicarse dende 2018 tras superar a situación de bancarrota económica anterior. Durante moitos anos as comunidades de augas foron xestionando o seu propio subministro, en moitas ocasións coa construción de pozos particulares nos fogares, pero a seca e os incendios provocaron que moitos pozos esgotaran e as redes de abastecemento das traídas sexan insuficientes. “Para o Concello trátase dunha cuestión de vital importancia, por iso debemos colaborar todo o que poidamos coas comunidades de augas, que están a facer un labor fundamental para que a gran maioría da veciñanza rural conte con este servizo básico e prioritario, algo que queremos agradecer profundamente”, salientou a rexedora.
Esta pioneira convocatoria de axudas permitiu realizar nos últimos anos investimentos por importe superior a 500.000 euros na maioría das parroquias con traídas veciñais. Entre as obras realizadas inclúense melloras nos sistemas de captación de auga, sistemas de almacenamento e potabilización e melloras nas redes de distribución de augas.
