O programa do verán en Ponteareas ‘Mocidade Viva’ continúa. Se tes máis de 12 anos de idade, anímate a participar nesta programación.
Mañá venres 28 de agosto haberá unha nova xornada de parkour. O encontro terá lugar ás 20:00 horas, no parque Ferro-Ucha. As anteriores xornadas do programa foron todo un éxito e tiveron unha alta participación. Por iso, a Concellería de Mocidade, que dirixe Miguel Bouzó, organiza un novo obradoiro.
Neste obradoiro contará con exhibicións nas que os e as participantes poderán amosar as habilidades adquiridas no campionato que se desenvolverá durante esta xornada.
Ademais, o mesmo venres 28 será tamén unha noite de percusión, co novidoso espectáculo de Robertoliveira. A Concellería de Cultura, dirixida por Fernando Groba, convida a toda a cidadanía a gozar do concerto ás 23 horas na Praza Maior.
Totalmente de balde e dentro do ciclo de “Noites ao Vivo” poderemos gozar deste percusionista dedicado á música contemporánea centrado na interpretación de novas obras con técnicas novidosas, recursos instrumentais renovados e aspectos escénicos inusuais. Roberto colabora activamente con compositores das novas xeracións para contribuir ao desenvolvemento da literatura para a percusión.