7.6 C
Pontevedra
Venres, 29 de Marzo de 2024
Máis
    HomeO CondadoPonteareas'Estrada Estilismos Home', 'Viveiros Canedo' e 'Bar Alimentación Fozara', gañadores dos premios...

    ‘Estrada Estilismos Home’, ‘Viveiros Canedo’ e ‘Bar Alimentación Fozara’, gañadores dos premios «Ponteareas, Lingua e Empresa»

    O Concello concedeu estes galardóns ás empresas que dan pulo ao galego e achegan a lingua día a día ás e aos consumidores

    Ponteareas recoñece un ano máis ás persoas ou empresas que, día a día, achegan a lingua galega dun xeito normalizado ás persoas consumidoras e “contribúen deste xeito ao aumento e mellora do uso social do galego no sector empresarial”. Así o recordou a alcaldesa, Cristina Fernández, durante a entrega dos premios ‘Ponteareas, Lingua e Empresa 2022’ durante a celebración no auditorio municipal da Gala da Lingua celebrada este 17 de maio, Día das Letras Galegas.

    Un galardón co que destacar o labor pola lingua feita por tres empresas da vila que este ano acadou Antonio Martínez Groba, de Estrada Estilismo Home, na categoría de ‘Traxectoria do uso da lingua galega ao longo de décadas’, polo uso do galego dende hai máis de 30 anos “tanto de xeito oral como facendo visíbel o idioma no rotulado do seu establecemento, nas tarxetas de visita, nos vales de agasallo e en todo tipo de publicidade da súa empresa”, segundo explicou a rexedora.

    Na categoría de ‘Uso continuado da lingua galega’, o premio foi para Viveiros Canedo SL pola utilización do galego na súa actividade dende o ano 2004 ata a actualidade, “tanto na comunicación interna como externa, ofertando positivamente produtos e orzamentos e facturas en galego, así como o seu uso no nome da empresa, na cartelería, no rotulado exterior, nas furgonetas e na publicidade de todo tipo, tanto en prensa como en radio, así como polo uso do galego nas redes sociais e na súa páxina web”, como resaltou o concelleiro de Lingua, Fernando Groba. Recolleron o galardón Marisol Lorenzo e Julia Rodríguez.

    Pola súa banda, Gumersinda Bugarín Codeseda, de Bar Alimentación Fozara, foi recoñecida na categoría ‘Incorporación recente ao uso da lingua galega’ por ser un establecemento de alimentación que, ademais de usar o galego na comunicación interna e externa e na súa cartelería, “incorporou de xeito decidido a lingua galega ás súas redes sociais nas que publicita o negocio e os seus produtos na lingua normal de uso no seu comercio, o galego, escollendo de xeito consciente a nosa lingua para achegarse á clientela”, destacou o edil. Recolleu o galardón Verónica Taboada.

    As empresas gañadoras recibiron unha escultura exclusiva do artista ponteareán Silverio Rivas creada para estes galardóns. Cristina Fernández trasladou os parabéns do Concelllo a todas e todos os gañadores, xa que “actitudes tan positivas como esta teñen unha grande importancia para o prestixio social da nosa lingua no ámbito socioeconómico, achegando aos veciños e veciñas ao galego e xerando unha maior receptividade ao seu uso na sociedade”.

    A Gala da Lingua estivo conducida polo actor Avelino González e contou coa actuación musical de Malvela, un dos grupos de música tradicional galega máis populares, prestixiosos e emblemáticos de Galicia, que fixeron gozar ao público con novas composicións, coplas populares e pezas tradicionais adaptadas á realidade cotiá.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.