17.6 C
Pontevedra
Luns, 15 de Abril de 2024
Máis
    HomeO CondadoPonteareasEntra en funcionamento a zona azul gratuíta do complexo deportivo Álvaro Pino

    Entra en funcionamento a zona azul gratuíta do complexo deportivo Álvaro Pino

    Con este sistema de estacionamento o número de prazas dispoñíbeis pasan de 42 a 336 entre as 07.00 e as 23.00 horas dos días laborábeis

    Dende este mesmo luns 27 de setembro xa está en funcionamento a zona azul do complexo deportivo Álvaro Pino de Ponteareas. O Concello acometeu hai uns meses a recuperación de todo ese espazo e da contorna do Centro de Saúde, habilitando un total de 166 prazas de estacionamento, 42 delas situadas diante da piscina de dos dous pavillóns municipais que foron sinalizadas como zona azul para o estacionamento por tempo limitado e gratuíto. Ademais instalouse o correspondente parquímetro para a expedición de tíckets.

    Este novo sistema estará operativo de luns a venres laborábeis entre as 07.00 e as 23.00 horas, coincidindo co horario de funcionamento do complexo deportivo. O estacionamento na zona azul estará limitado a un máximo de dúas horas na quenda de mañá (de 07.00 a 15.00 h) e outras dúas na quenda de tarde (entre as 15.00 e as 23.00 h). É dicir, un mesmo vehículo poderá estacionar un máximo de dúas horas en cada unha desas dúas franxas horarias. Este límite horario responde aos datos do propio Complexo Deportivo, que sinalan unha estancia media nas instalacións claramente inferior ás dúas horas. Para aquelas persoas que fan un uso máis prolongado do estacionamento existen outras 124 prazas sen límite de tempo no resto da contorna do Complexo Deportivo e do Centro de Saúde.

    O concelleiro de Mobilidade, Roberto Mera, salientou que “con esta medida repártese de forma racional e equitativa o espazo existente, aténdese mellor a demanda das persoas que precisan acudir en coche e evítase que vehículos alleos ás instalacións acaparen durante moitas horas os aparcamentos”. Mera animou á veciñanza do centro urbano de Ponteareas a acudir ás instalacións a pé ou en bicicleta. “Calquera punto da vila atópase, camiñando, a menos de 10 minutos do Complexo Deportivo e agora temos unha contorna nestas instalacións amábel, segura e agradábel que convida a achegármonos de forma saudábel e sustentábel”, explica o edil.

    Tendo en conta que as prazas existentes son 42 e que a ocupación máxima é de dúas horas, as prazas dispoñíbeis nas 16 horas de funcionamento do Complexo Deportivo multiplícanse polo menos por 8, converténdose en 336. Mera salientou o éxito doutra medida semellante posta en marcha recentemente na rúa Real, ao pé dunha farmacia, na que se crearon varias prazas de 10 minutos “que permiten que centos de vehículos paren a diario polo tempo imprescindíbel neste servizo esencial nun lugar onde antes permanecían os mesmos vehículos horas ocupando ese espazo. Ademais, aseguramos o tránsito peonil seguro nese mesmo lugar que antes non era posíbel pola ocupación permanente de vehículos”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.