24.5 C
Pontevedra
Venres, 19 de Xullo de 2024
Máis
    HomeO CondadoPonteareasArcos celebra a VII Feira de Outono esta fin de semana

    Arcos celebra a VII Feira de Outono esta fin de semana

    A Casa Cultural de Arcos celebra esta fin de semana a súa VII Feira de Outono, recuperando esta actividade iniciada en 2014 e interrumpida dende 2020 con motivo da pandemia. O presidente da Casa Cultural, Roberto Mera, salientou que “o amplo programa deseñado para o evento inclúe dende xornadas micolóxicas, con curso, saída ao monte, exposición e obradoiro infantil, pasando polo magosto e os concertos, así como varias actividades gastronómicas”.

    As actividades inícianse o venres ás 19:30 cun curso de icoloxía a cargo de Gabriel Pérez Torrón, biólogo, membro do laboratorio de micoloxía da Universidade de Vigo. O prezo é de 15 € para socios da Casa Cultural e 20 € para non socios. O curso continuará o sábado de 10:00 a 13:30 con saída ao monte e de 15:30 a 17:30 coa identificación de cogumelos. As actividades micolóxicas tamén inclúen unha saída ao monte dirixida a nenos e nenas o sábado ás 15:30 horas, unha exposición de cogumelos o domingo dende as 11:00 da mañá acompañado dun obradoiro para nenos e nenas con numerosas actividades de entretemento e coñecemento. Sen afastarnos da micoloxía, o domingo ás 14:00 celebrarase un xantar de outono onde os cogumelos terán un protagonismo especial. O menú componse de potaxe de castañas ao estilo San Amaro, empanada de cogumelos de tempada, risotto á milanesa tamén con cogumelos de tempada, flan de castañas ao chantilly, bebida e café, por un prezo de 15 euros para socios, 20 para os non socios e 10 euros para nenos.

    Tanto no curso de micoloxía como no xantar as prazas son limitadas e é precisa a inscrición previa na Cafetaría da Casa Cultural, por watsap no 628367616 ou en parroquiadearcos@gmail.com.

    Continuando coas actividades gastronómicas, o sábado celebrarase o concurso de receitas de sobremesas de outono, que deben incluir algún dos seguintes ingredentes: castañas, noces ou cogumelos. A entrega de sobremesas farase de 16:00 a 17:00, e tras resolver o xurado haberá degustación ás 17:30. Haberá premios para as tres primeiras receitas e agasallos para as persoas participantes e non é precisa a inscrición previa.

    A seguir, comezará o magosto, dende as 18:00 do sábado, onde se ofrecerán castañas, chourizo e viño ao tempo que se desenvolverá o Fiadeiro de Outono con música tradicional ao vivo nun evento aberto a calquera grupo de música tradicional. A música tamén terá a súa presenza ás 21:30 coa actuación de Dos hombre y tercio, organizado pola cafetaría da Casa Cultural e co concerto o domingo ás 17:00 do dúo de música galega “Tabernarios” con Víctor Movilla e Marcelo Dobode.

    O presidente da Casa Cultural, Roberto Mera, animou a toda a veciñanza de Ponteareas a achegarse a Arcos a desfrutar deste programa que pon en valor a estación de outono combinando actividades lúdicas e gastronómicas con outras formativas e culturais.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.