O grupo ecoloxista adenco organiza, para este vindeiro domingo, 25 de agosto, un roteiro polo río Uma. A andaina, de dificultade baixa, sairá ás 10 horas da igrexa de Angoares e non precisa inscrición previa, tan só estar no punto de reunión á hora indicada.
Adenco elixiu a igrexa de Angoares como punto de partida, ao tratarse dun elemento único do románico galego e unha das tres únicas igrexas coas súas características en España, “con outros segredos que descubriremos o domingo”, sinalan os organizadores.
Dende alí, sairase para remontar o río Uma entre muíños, pontes, freixas e un bosque de ribeira moi ben conservado, ata chegar ao final da ruta, na Ponte do Cabalón, onde se emprenderá o camiño de volta.
Ademais, o roteiro inclúe a visita a un muíño rehabilitado e en funcionamento. A actividade, como todas as que organiza Adenco, é totalmente gratuíta.