O Concello de Ponteareas deu conta hoxe da reapertura paulatina da actividade da ‘feira dos sábados’ que mañá reiniciará a súa actividade coa apertura de postos de produtos agrícolas (hortalizas, plantas, froitas…). Estes primeiros postos de venda ambulante de produción agrícola estarán ubicados na praza Bugallal para poder cumprir as esixencias de seguridade e distancia, estando os espazos delimitados e vixiados por Protección Civil.
O Concello lembra a todas e todos os veciños a importancia de “aterse ás recomendacións sanitarias e saír nas condicións e nos casos recollidos na normativa”.
Por outro banda, o goberno local lamenta o criterio “errático” da Delegación do Goberno. O luns día 4 de maio a Xunta de Galicia autorizou a celebración dos mercados e o Concello “comezou a contactar cos produtores e a preparar a loxística e organización da feira do sábado día 9”, explica o Goberno que preside Xosé Represas.
Porén, o xoves día 7 “a Delegación do Goberno, contra a decisión da Xunta de Galicia de permitir os mercados, anuncia a prohibición de celebración dos mesmos obrigando ao Concello a desconvocar aos produtores”.
Vintecatro horas máis tarde, é dicir hoxe, a Delegación do Goberno “mudou o seu criterio e anuncia que agora “si” se permite a celebración véndose de novo o Concello obrigado a convocar a última hora aos e ás produtoras interesados en vender na praza Bugallal.
