18.7 C
Pontevedra
Luns, 24 de Xuño de 2024
Máis
    HomeO CondadoPonteareasA Aula CeMIT de Ponteareas ofrece novos cursos totalmente de balde

    A Aula CeMIT de Ponteareas ofrece novos cursos totalmente de balde

    A concellaría de Innovación e Desenvolvemento Tecnolóxico, que dirixe Benito Márquez, informou hoxe da apertura do prazo de inscrición dos novos cursos que oferta a Aula CEMIT de Ponteareas, situada no Centro Social, na rúa Oriente.

    Neste mes de maio, a aula CEMIT de Ponteareas ofrecerá cursos de manexo básico de móbil Android e de ordenador e navegación; cursos que serán presenciais e en grupos reducidos, que teñen o obxectivo de mellorar o seu manexo do teléfono móbil/tableta e das súas aplicacións para a procura de información, para a realización de xestións coas administracións e para facilitar ferramentas dixitais que lle axuden no ámbito social e familiar. Tamén haberá cursos online de iniciación ao WordPress, cursos de deseño gráfico con software libre (Inkscape) e sobre a creación de publicacións na nube (CANVA).

    A inscrición nos cursos pode realizarse na ligazón https://cemit.xunta.gal/gl/centro/59

    O alumnado contará con titorías online e offline por correo electrónico e en liña segundo cita previa no horario de atención da aula todos os días de 9 a 11 horas e os mércores de 21:30 a 22:30hrs.

    A aula CEMIT ofrece formación informática totalmente de balde, axeitando o deseño dos cursos á demanda e necesidades da cidadanía. Por este motivo, o responsable dos cursos recorda que as persoas interesadas poden achegar á aula CEMIT suxestións para estudar as necesidades de formación informática e programar distintos niveis e contidos a medida da demanda.

    “O obxectivo desta aula é promover a inclusión no uso das novas tecnoloxías, ofrecendo os coñecementos necesarios para que as persoas poidan desenvolverse cun ordenador, e prestando especial atención aos colectivos máis afectados pola fenda dixital”, explica Benito Márquez. O concelleiro sinala que tamén se busca “fomentar a formación dixital entre os profesionais e achegar ás PEMEs as vantaxes da Sociedade da Información”. Márquez animou á veciñanza “a que se anoten nos diversos cursos e aproveiten esta oportunidade”.

    Para obter máis información ou trasladar as súas necesidades formativas, as persoas interesadas deberán contactar a través de chamada ou de mensaxe de whatsapp no número de teléfono 634 238 962 ou de correo electrónico cemit.ponteareas@xunta.gal.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.