16.5 C
Pontevedra
Xoves, 20 de Xuño de 2024
Máis
    HomeO CondadoMondarizOs froitos secos, tema principal das segundas xornadas de oportunidades de desenvolvemento...

    Os froitos secos, tema principal das segundas xornadas de oportunidades de desenvolvemento no medio rural de Mondariz

    Superada a emerxencia sanitaria que trouxo a Covid-19, o Concello de Mondariz recupera este último trimestre de 2021 varias actividades iniciadas en 2019 que foron suspendidas o ano pasado. Unha destas actividades son as xornadas de oportunidades de desenvolvemento no medio rural, organizadas directamente pola Concellería de Desenvolvemento Económico e Turismo que dirixe o alcalde, Xosé Emilio Barros, co obxectivo estratéxico de promover iniciativas de recuperación de terras abandonadas e valorar as oportunidades de emprendemento que ofrece a contorna.

    Esta segunda edición, programada para o día 6 de novembro, xirará arredor dos froitos secos e, máis en concreto, do cultivo da abelá para a súa comercialización e transformación produtiva. Ao igual que na primeira edición –realizada en 2019 arredor da fruticultura e os produtos derivados da mazá, como a sidra–, as xornadas contarán coa participación de persoas de referencia no sector, tanto no ámbito da investigación como no do desenvolvemento de negocios e mercados.

    “O Concello de Mondariz está comprometido cun desenvolvemento socioeconómico sostible do medio rural e nos últimos anos ten acollido varias xornadas formativas e informativas sobre as oportunidades de desenvolvemento agrogandeiro organizadas en colaboración con outras entidades, a última delas sobre planificación e deseño de plantacións de castiñeiro para froito. Estas xornadas de oportunidades de desenvolvemento no medio rural, no entanto, forman parte dun programa anual promovido e organizado directamente polo Concello de Mondariz”, explica o alcalde, Xosé Emilio Barros.

    O evento, que terá lugar no Centro Social de Mondariz con entrada libre e gratuíta até completar a cabida permitida, comezará ás 10:00 horas, coas palabras das autoridades e primeira das ponencias, a cargo de Francisco Javier Silva Pando, xefe do departamento de Ecosistemas Forestais do Centro de Investigación Forestal de Lourizán, que introducirá o tema dos froitos secos en Galicia falando das súas características e do seu aproveitamento. Despois dunha pausa para o café, ás 12:00 horas está prevista unha ponencia de Pedro Álvarez Durán, director de operacións e planta da empresa El Nogal, sobre a transformación, o envasado e a comercialización dos froitos secos.

    As xornadas continuarán en horario de tarde, a partir das 17:00 horas, cunha terceira ponencia a cargo de Juan Carlos García, técnico no centro de investigación Serida (Servizo Rexional de Investigación e Desenvolvemento Agroalimentario de Asturias), unha referencia estatal na investigación sobre cultivos de abelá e recuperación de variedades tradicionais. A última das ponencias corresponderá a Manuel Álvarez, promotor adicado á produción de abelá na comarca da Paradanta, que compartirá a súa experiencia de plantalación de abeleiras para froito en Crecente. Seguindo a mesma estrutura que na primeira edición, as xornadas rematarán ás 19:00 horas cunha degustación de froitos secos e produtos derivados da abelá.

    “Detrás da organización destas xornadas hai meses de traballo, tanto para buscar ás persoas máis expertas na materia como para axendar as ponencias. A pandemia e as restricións relacionadas imposibilitaron a organización das xornadas o ano pasado, pero tiñamos claro que había que recuperar estas actividades canto antes para promover unha dinamización do rural desde a perspectiva do emprendemento no sector primario, que ten enormes oportunidades en concellos como o de Mondariz”, afirma Barros.

    Na misma liña estratéxica, o Concello de Mondariz vén de aprobar a creación dun novo viveiro de empresas en espazos públicos municipais para facilitar as actividades de xestión e comercialización das empresas e das persoas emprendedoras na súa etapa inicial. Malia que o viveiro de empresas tan só inclúe polo momento espazos para oficinas no edificio do Centro Social e espazos para postos de venda no da Praza de Abastos, o Goberno municipal ten en mente habilitar o edificio do antigo matadoiro nun futuro para actividades de transformación, chegando a cubrir deste xeito as necesidades de xestión, comercialización e transformación que poidan ter as novas iniciativas empresariais. “É un concepto de coworking adaptado ás necesidades do sector agroalimentario, por iso vemos importante incluír nun futuro espazos para a transformación de produtos agrogandeiros”, indica Barros.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.