A concelleira de Servicios Sociais e Sanidade do Concello de Mondariz, Mª José Álvarez Rodríguez, ven de rexistrar unha queixa formal na Xerencia de Atención Primaria de Vigo, polo traslado temporal dun médico do centro de Saúde de Mondariz a Salvaterra. A esta situación engádese o feito que ata o 14 de agosto, non disporá o Centro de Saúde de servizo de Pediatría.
Tal e como figura na queixa formal, na xornada do martes 18 de xullo, un dos tres médicos que prestan os seus servizos no centro de saúde de Mondariz, foi desprazado ó centro de saúde de Salvaterra para cubrir ausencias de persoal de dito centro. Os pacientes citados miraron canceladas as súas citas, sen saber para cando poderán ser recitados.
As urxencias e trámites burocráticos que non poden ser aprazados, como partes de baixa, controis de Sintrom, foron atendidos polo persoal do Centro, incrementando a xa considerable sobrecarga asistencial habitual, nun centro con poboación moi envellecida, maiores con moita patoloxía e con asistencias diarias en domicilios. A día de hoxe o Concello afirma seguir sen resposta por parte das autoridades sanitarias e sen solución algunha.
Doutra banda, dende o luns 24 de xullo ata o día 14 de agosto, o centro de saúde de Mondariz carece de servizo do pediatría polo que, no caso de xurdir algunha urxencia, as e os usuarios terán que desprazarse ata o centro de saúde de Salvaterra que está a 30 minutos do centro de saúde de Mondariz, quedando sen poder axendar as revisións pediátricas do Programa do Neno San e as consultas.
O concello de Mondariz solicita “unha substitución na súa totalidade do persoal para poder prestar con garantías e eficiencia unha atención primaria adecuada á poboación de referencia”. Toda esta desorganización e falta de previsión –afirman– “tradúcese en non poder concertar citas, en consecuencia, danar á atención adecuada ó paciente e usuarios”.
