A Xunta de Goberno da Deputación de Pontevedra acaba de aprobar unha axuda de preto de 70.000 euros para que o Concello de Mondariz poida poñer a punto o recinto no que se está a construír unha nova área de deporte urbano. Desta maneira, os fondos destinaranse a arranxar a explanada, reparar o seu asfalto e modificar o seu muro perimetral.
“A aposta polo deporte é un obxectivo prioritario deste goberno provincial”, asegurou o presidente da Deputación, Luis López. “E non soamente no que respecta á práctica do deporte ou a apoiar clubs e entidades deportivas, tamén queremos dirixir recursos para que os concellos da provincia conten con espazos axeitados para a súa práctica. E esta inxección de 70.000 euros en Mondariz é un exemplo”, confirmou.
A área de deporte urbano que se vai crear en Mondariz, que incluirá skatepark, pista multideporte, rocódromo e un circuíto de calistenia, conta xa con 400.000 euros de subvención da Deputación, que supoñen o 90% do orzamento total da mesma, polo que, en total, a institución provincial dirixe 470.000 euros a este novo equipamento deportivo. Situado no antigo campo de fútbol da Minada, na avenida do Grupo Escolar, abrangue unha superficie total de 4.5000 metros cadrados. Será un espazo accesible e eficiente enerxeticamente, e contará, entre outros elementos, con paseos e zonas de descanso, cun miradoiro, zonas de confort, mobiliario urbano, vexetación e sombreo natural e artificial.
