Despois dunha programación de verán caracterizada pola recuperación do formato tradicional das Festas Patronais da Peña de Francia e San Roque e a participación veciñal na organización de actividades socioculturais, o Concello de Mondariz mantén a mesma filosofía na programación de outono, que se presentará de mes en mes.
Coa chegada do frío, este mes de outubro regresan as proxeccións cinematográficas no auditorio municipal de Mondariz, que en 2020 foi habilitado cunha pantalla móbil de grandes dimensións e un moderno equipamento audiovisual para cumprir a función de sala de cinema. Onte venres 7 e o 21 de outubro están programadas noites de cinema clásico, coa proxección de comedias míticas de Charles Chaplin (“O circo”, 1928), Buster Keaton (“O moderno Sherlock Holmes”, 1924) e dos irmáns Marx (“Unha noite en Casabranca”, 1946). A entrada, como de costume, será libre e gratuíta até completar a cabida. Estas proxeccións están baixo licenza Umbrella MPLC.
Espectáculos familiares
Durante este mes tamén están programados tres espectáculos familiares, dous deles nos marcos dos programas FalaRedes e Ler Conta Moito. O día 15, a Praza de Abastos de Mondariz acollerá o espectáculo lúdico e musical “Xogar e aprender en galego mola” (20:00 horas). O día 22, Mago Paco presentará o seu espectáculo “Maxia Divertida: Contamaxias” no mesmo lugar (20:00 horas). E o día 31, o Concello de Mondariz anima aos máis cativos a celebrar o Samaín co espectáculo “Esqueteles bailade”, de Animar-T, no auditorio municipal (18:00 horas).
Actividades lúdicas e deportivas
A participación veciñal, a través de colectivos e asociacións da localidade, está detrás doutras das actividades programadas no mes de outubro. É o caso da V Marcha BTT “Montes de Mondariz”, organizada pola Asociación Deportiva Mondariz co apoio do Concello de Mondariz, e que aspira a atraer decenas de participantes o 12 de outubro.
O 23 de outubro, o Mondariz FC organiza a súa tradicional Festa dos Callos xunto á igrexa de Mondariz. E o 29 deste mes, a Comisión das Festas de Mondariz 2022-2023 recadará fondos cunha festa na Praza de Abastos inspirada nos anos 60, 70 e 80.
