O circuíto asfaltado de pumptrack de Mondariz, construído en 2021 nas instalacións municipais do Campo da Minada, será a sede do Campionato de Galicia de BTT Pumptrack, que xa está incluído no calendario de competicións da Federación Galega de Ciclismo. Esta proba terá lugar o 26 de agosto e se presenta como II Pumptrack Nocturno de Mondariz, dando continuidade ao evento organizado en setembro de 2022 para inaugurar estas instalacións deportivas.
Actualmente, sobre o Campo da Minada estanse desenvolvendo unhas obras para construír unha gran área de deporte urbano de 4.500 metros cadrados de superficie que está chamada a sentar as bases do futuro crecemento urbanístico da localidade, centrado en conectar as turísticas praias fluviais co núcleo urbano de Mondariz. “Con este centro de ocio e deporte urbano, que estará rematado nas próximas semanas, buscamos dinamizar socioculturalmente a localidade e ofrecer alternativas de lecer saudable á mocidade actual, así como promover o turismo”, explica Xosé Emilio Barros, alcalde de Mondariz.
O circuíto asfaltado de pumptrack, de 1.200 metros cadrados de superficie e financiado polo Plan Concellos 2020 da Deputación de Pontevedra, foi o primeiro paso do Goberno municipal no seu proxecto de recuperación do Campo da Minada, un importante espazo público, estratexicamente ubicado na Avenida Grupo Escolar xunto ao CPI de Mondariz, a Casa do Concello, a Biblioteca Pública Municipal e o parque infantil do Monte da Ovella, que levaba anos en estado de abandono. “O campo de fútbol de céspede artificial que se construíra hai dúas décadas estivo en desuso por non cumprir as medidas regulamentarias para a competición. Nós tivemos en conta esa situación e adaptamos a pista ao regulamento de BTT pumptrack da Real Federación Española de Ciclismo, co obxectivo de poder acoller competicións deportivas profesionais”, sinala Barros.
A oportunidade de completar o ambicioso proxecto de centro de ocio e deporte urbano do Campo da Minada chegou co plan Reacpon da Deputación de Pontevedra, que financiou a iniciativa municipal co 90 % do importe das obras, que están valoradas en 435.644 euros. Xunto ao circuíto asfaltado de pump track estanse construíndo pistas multideportivas para a práctica de skate, escalada e calistenia, entre outras actividades con gran demanda entre a mocidade actual.
Nesta ligazón pódese consultar o calendario competitivo da Federación Galega de Ciclismo.
