Le pianO du Lac é un orixinal espectáculo musical que ten xirado por toda Europa desde 2014. Despois da boa experiencia do ano pasado, repite no escenario natural da praia fluvial do Val, no Concello de Mondariz, para ofrecer en Galicia dous concertos flotantes da xira “Idóneas” os días 3 e 4 de agosto.
Como espectáculo, Le pianO du Lac vai máis aló do concerto clásico e presenta un innovador enfoque de transhumancia sonora que fusiona música, teatro e danza en escenarios naturais. O piano descansa sobre dous flotadores ciclopropulsados que permiten unha inusual mecánica pianística a pedais. O equipo técnico e artístico inclúe varios pianistas capaces de interpretar e mesturar diferentes tradicións sonoras. No entorno natural do concerto, ademais, a experiencia sensorial enriquécese cos sons da auga, do vento, da fauna salvaxe…
Nos concertos flotantes de Mondariz, programados para as 20:00 horas dos días 3 e 4 de agosto, actuarán a pianista Violette Prevost, a cantante Claire Grupallo e a bailarina Myriam Grupallo, entre outras artistas. As entradas poden reservarse no sitio web de Le pianO du Lac (www.pianodulac.eu). Non haberá asentos porque a praia fluvial do Val é un espazo natural, pero é posible acudir con cadeiras propias ou coxíns persoais para sentar no chan.
O espectáculo da xira “Idóneas, coproducido xunto a compañía asturiana La Xata la Rifa, é unha nova proposta flotante formada por un dúo que navega entre a melodía lírica e a canción popular. O seu repertorio franco-español inclúe composicións propias de Violette con arranxos para dúas voces. A parella convértese nun trío cando unha mergulladora asalta a plataforma do “PedalOpiano” cos seus pasos flamencos.
“Con este espectáculo internacional nun entorno natural, apostamos por unha programación cultural de calidade que mesmo atraia visitantes doutros concellos. Somos da filosofía de que menos é máis, e preferimos a calidade fronte a cantidade”, explica Anxos Carballo, concelleira de Cultura do Concello de Mondariz.
