A Coral Polifónica ‘Santa Baia de Mondariz’, coa colaboración do Concello, organiza este sábado, 9 de novembro, o ‘VI Encontro de Corais Vila de Mondariz’, un evento cultural consolidado na axenda municipal que este ano conta con tres corais galegas convidadas.
O concerto arrancará ás 19:30 horas no auditorio do Centro Social de Mondariz, con entrada libre até completar aforo.
A Coral Polifónica Santa Baia, composta de 35 voces mixtas e dirixida desde o ano 2000 por Víctor Fernández Nogueiras, posúe un extenso repertorio (cancións populares, habaneiras, cancións galegas, zarzuelas, música sacra e contemporánea) e ten participado en numerosos certames nacionais e internacionais.
Nesta sexta edición do ‘Encontro de Corais Vila de Mondariz’ compartirá escenario coa Coral A Torre de Maside (Ourense), a Coral Fonte do Souto de Culleredo (A Coruña) e a Coral Voces e Cordas de Sobrado do Bispo (Ourense).